Diyarbakır merkez Yenişehir Belediyesi, geçen yıl ihale yoluyla satışa sunduğu ve gelen tepkilerin ardından iptal edilen Dokuzçeltik Mahallesi’ndeki alanı yeniden ihaleye çıkarıldı.

Di heftemîn rûniştina doza Tahir Elçî de careke din dadgehê biryar nehat dayîn. Rûniştina dozê ji aliyê dadgehê ve heta 29ê Mijdarê hat paşxistin.

Heftemîn rûniştina doza parêzerê Kurd û serokê berê yê Baroya Amedê Tahir Elçî ku sala 2015an di êrîşeke çekdarî de hatibû kuştin, îro 5ê Temûzê demjimêr 10:00an li 10emîn Dadgeha Cezayên Giran a Amedê hat sazkirin.

Di çarçoveya dozê de 4 kes tên darizandin ku 3 jê polîs in. Di dozê de kesê bi navê Ugur Yakişir ku nehatiye girtin bi daxwaza cezayê heta hetayê û polîsên bi navên S.T., F.T. û M.S. jî bi daxwaza cezayê 2 sal û 6 mehan tên darizandin.

Heyeta dadgehê di civîna îro de daxwazên ji bo lêkolînên li cihê bûyerê û guhdarîkirina polîsên îstîxbaratê red kirin.

Di civînê de herwiha heyeta dadgehê piştî îfadeyên bersûc û şahidan biryara xwe ya demkî eşkere kir û doz heta 29ê Mijdarê paşxist.

Tevî ku di ser kuştina wî re 8 sal derbas bûne, lê heta niha ji bo Doza Tahir Elçî biryarek derneketiye.

Hevjîna Tahîr Elçî, Turkan Elçî, Parlamentera Partiya Çepên Kesk a Amedê Halîde Turkoglu û endamê Komîsyona Lêkolîna Mafên Mirovan a Meclîsê û Parlamenterê CHPê yê Amedê Sezgîn Tanrîkulu jî beşdarî rûniştinê bûn.

Yekîtiya Baroyên Tirkiyê, rêxistinên sivîl, baro û heyetên biyanî jî beşdarî rûniştina dozê bûn.

Baroya Amedê di peyamekê de ji bo doza parêzerê Kurd û serokê xwe yê berê, banga hevkariyê û beşdarûna di civîna îro ya dadgehê de kiribû.

Serokê Baroya Amedê yê berê Tahir Elçî 28ê Mijdara 2015an dema ku ji bo şermezarkirina hilweşandina Minareya Çar Ling a dîrokî ya li navçeya Sûrê daxuyanî dida medyayê di êrişeke çekdarî de gule li serê wî ketibû û di encam de canê xwe ji dest dabû.

Doza Tahir Elçî piştî kuştina wî bi 5 salan hatibû vekirin û yekemîn rûniştina dozê di 21ê Cotmeha 2020an de hatibû lidarxistin. Şeşemîn rûniştina dozê jî di 23ê Mijdara 2022an de hatibû kirin.