Li Dêrezorê Encûmena Leşkerî ya Dêrezorê û Hêzên Asayişa Navxweyî qedexeya derketina derve ragihand.

Şer û pevçûnên dijwar ên di navbera Hêzên Sûriyeya Demokratîk (HSD) û beşeke Encûmena Leşkerî ya Dêrezorê û hinek eşîran de berdewam in.

Hêzên Sûriyeya Demokratîk (HSD) li ser şer û pevçûnên Dêrezorê daxuyaniyeke nû da.

HSDyê di daxuyaniya xwe de anî ziman:

“Ji ber rewşa aloz a li gundên rojhilatê Dêrezorê qedexeya derketina derve hat ragihandin.”

HSDyê li ser sedema ragihandina derketina derve jî got:

“Ji ber ku komên çekdar ên girêdayî saziyên ewlehiyê yên rejîmê û şaneyên DAIŞê hewl didin fitneyê belav bikin û sivîlan ber bi planên xwe yên qirêj ve bikişînin, Meclîsa Sivîl a Dêrezorê û Hêzên Ewlekariya Hundirîn qedexeya derketinê radigihîne.”

HSDyê li ser dema qedexeya derketina derve jî anî ziman:

“Qedexe dê sibe 2yê Îlonê di demjimêr 05:00an de dest pê bike û 48 demjimêran bidome.”

Çi bûbû?

Şeva yekşemê hêzên taybet ên Hêzên Sûriyeya Demokratîk (HSD) li parêzgeha Dêrezorê operasyoneke berfireh a bi navê “Xurtkirina Ewlehiyê” dabû destpêkirin.

Di operasyonên HSDyê de serokê Encûmena Leşkerî ya Dêrezorê Ehmed el-Xebîl Ebû Xewle û çend kesên nêzîkî wî hatibûn desteserkirin.

Piştî desteserkirina serokê Encûmena Leşkerî ya Dêrezorê Ehmed el-Xebîl Ebû Xewle, li herêmê alozî gur bûn.

Li ser vê yekê, alîgirên Ebû Xewle êrişî xalên HSDyê û Hêzên Ewlekariya Hundirîn kir.

Herwiha çekdarên din jî êrîşî binkeya HSDyê ya li bajarokê El Besîrayê yê li gundewarê rojhilatê Dêrezorê kir.