Yusuf Topçuyo dêrsimij dima ke 25 serran Bursa de ciwîya agêra Dêrsim. Topçuyî vat: ''Seba ke ez bi kulturê xo biciwîya û newe ra ber bîyara agêraya dewa xo.''

Yusuf Topçu 25 serran şaristanê Bursa de ciwîya. 25 serran dima Topçu agêra dewa xo ya Salordekî ya qezaya Pilemurîye ya Dêrsimî.

Yusuf Topçuyî îfade kerd ke o xo dewe de azad hîs keno û cuya dewe hetê merdimîye ra hol a. Yusufî ard ziwan ke o hînî wazeno pê kulturê xo biciwîyo û têna dewa xo de eşkeno wina bikero. 

Topçuyî vat: ''Şaristanan de ma mîyanê betonî de mirenê şinê. La cuya dewe hem azadî ya hem zî berardiş a.  Ti eşkenê dewe de berhemanê xo bîyarê û pê kulturê xo biciwîyî. Ez cuya şaristane nêmusaya. Şaristanan de ti nêeşkenî çewî rê vajî 'ma bi xêr dî.' Cuya şaristanî mi rê zor bîye. Şaristanan de sîstem to rê yew kultur ferz keno. Eke ti rêxistinkerde nîyî pê şaristanî nêeşkenî.''

Topçuyî wina dewam kerd: ''Mi qetî bira agêrayîşî daye. Şaristan de têna şerê ekonomî esto, domanê to kokê xo ra cîya benê. Ti nêeşkenê ziwanê xo, kulturê xo bimusnê domananê xo. Yanî ti vanî ekonomî la ê mîyanî de kesayetê to destî ra şino.''