Qezaya Pulurî ya Dêrsimî de serranê 1994an de dewî ameybî vengkerdene. Dewijê ke newe ra dewa xo awan kerde îfade kenê ke 8 serrî yo dewan de problemê awe û ceyranî esto la dewlete mesele reyde eleqedar nêbena.

Leşkeranê dewleta tirke 1994 de dewa Çayustu ya qezaya Pulurî ya Dêrsimî veng kerdbi û vêşnabi. Roniştoxanê dewe 2013î ra dima verê xo newe ra da dewe û dest pê awankerdişê dewe kerd.

Roniştoxê ke dewe de pê zîretî debara xo kenê û gereka roje de di reyî awe bidê hêgayanê xo la dewe de problemê awe û ceyranî esto. 

Dewijî bêçarîye ra jeneratorê ceyranî û pê motoran awe peyda kenê. Heta nika selahîyetdaran meseleyê dewe çareser nêkerdî. 

Muxtarê dewe Baba Demîrî vat: ''Ma 2013î ra nata seba ardişê ceyranî xo ver danê la selahîyetdaran eleqe  nêmojna mesele. Soz danê la çîyêk nêkenê. Ma nêeşkenê awe bidê erdê xo. Ma zaf reyî muracat kerd la çîyêk nêbi. Eke mesele çareser nêba ma hînî nêeşkenê erdê xo biramê. ''

Dewije Şîrîne Mor zî pare kerd ke înan dewa xo ra fek vera nêda reyna agêrayî ci, newe ra banî viraştî, darî ramitî la 8 serrî yo dewe de ceyran çin o. Şîrîne vat: ''Semedo ke awe çin a ma nêeşkenê kincanê xo bişuwê. Ma zaf muracatî kerdî la netîceyêke tira nêvejîyaye.''

Dewije Gulseneme Batik zî waşt ke wa meseleyê dewe cade bêrê çareserkerdene.