Keyeyê ke Dêrsim de, serra 1993 de dewa înan ameya vêşnayene, 26 serran ra dima wazenê agêrê erdanê xo ser. 3 keyeyê ke 2 mengîyo ke seba hetkarîye sazîyanê fermîyan rê muracat kenê êdî qayîlê agêrê dewa xo.

Gomê Laşikî yê dewa Agaçpinarî ya pabesteya qezaya Pulurî ya Dêrsimî serra 1993 de hetê eskeran ra ame vêşnayene û dewe bi zor amey vengkerdiş. Qasê 10 serrîyo ke, keyeyê ke mecbûr mendî gomê xo ra vejîyê, bar kerdî şîyî şaristananê rocawanê Tirkîya. Keyeyê ke ê şaristanan de bica bîyî, bi desan karanê ravêrteyan de xebetîyayî ke bieşkê cuye de payanê xo ser o bimanê.

Tayê keyeyê ke paweyê netîceyê muracatê fermî yê, wazenê ke selahîyetdarî wezîfeyê xo bîyarê ca. Keyeyî vanê eke ê sazîyanê fermîyan ra cewabêko negatîf bigêrê, ê do dewa ke tede bîyê meyman ra agêrê Kocaelî û Bûrsa.

Hasan Sakîno (63) ke Kocaelî ra ameyo, înan pêvînayîşê xo yê bi selahîyetdaran ê seba akerdişê rayîrê dewe, ardişê elektrîk û awe ra tu netîceyêk nêgirewto û vat gereî dewlete înan rê hetkar bo. Sakînî vat dewa înan 1993 de ameya vêşnayene, yew keynaya ci astengdar a û merkezanê şaristanan de bi serran sey mehkûman ciwîyayo. Sakînî va, ez hendî wazena hewayo pak bigêrî û bibî wayîrê cuyêka bihuzûre.

‘Ma wareyê xo de multecî yê’

Sakînî wina dewam kerd:  bi serran o ma dewa xo rê hesret mendê . Maya mi Fatma hesreta wareyî ra kanser bîy û merd. Ma nêeşkê cenazeya aye zî bîyarê dewe. Seba ke dewe ser o qedexe estbi, ma a Kocaelî de defin kerde. Waştişê aye yo tekane agêrayîşê dewe bi. Mengêk esto ma keyeyê yewna kesî de manenê. Ma wareyê xo de sey multecîyan ê. Hendî wa no hal biqedîyo.”

‘Mi zaf bîrîya dewa xo kerda’

Sabrîye Yagmaza (55) ke dimayê koçkerdişê bi zorî şîya Kocaelî û nika agêraya zî hendî wazena abigêra dewa xo. Yagmaze vana: “Mi zaf bîrîya dewa xo kerda. Ez ameya, la nêeşkena şirî dewa xo. Ez hendî nêwazena bajaran de biciwî. Bajarî her cayê mi mîyanê nêweşî de verda. Naye ra ez nêwazena bajar de bimanî. Cuya ma tim bi koçî ravêrte, wa tîya ra tepîya wina nêbo.”

‘Wa bîrî û hesrete biqedîyê’

Şukru Koçero (55) ke Bûrsa ra ameyo zî va: Pêvînayîşanê ke ma walî û qeymeqamî dir kerdo, ma rê ame vatene ke serranê 2014-2015î de destekê înan ê seba agêrayîşê dewe ameyo birnayene û hendî do destek nêro dayene. Serra 1993 de dewa ma, keyeyê ma ameyî vêşnayene û ma bi zor ameyî koçkerdene. Kokimê ma hesreta memleketî ra merdî, tayê zî bîyî nêweş. Ma seba ke hesreta ma ya serran biqedîyo agêrayî.”