Dêrsim de bi dîyayîşê hamnanî nufus zêdîyeno û ney reyde hûmara nêweşanê Korona zî zêdîyena. Serekê SESî yê Dêrsimî Kahraman Yurukî pare kerd ke şaristan de roje de 45-50 kesî pê Korona kewenê.

Tirkîya û Vakurê Kurdîstanî de waqayê janê Korona reyna zêdîyenê. Dêrsim de seba ke hamnan de nufusê şaristanî zêdîyeno, sixletîye bena janê Korona zî bi lezî vila beno.

Serekê Sendîkaya Kedkaranê Weşîye û Xizmetanê Komelkîyan (SES) a Dêrsimî Kahraman Yurukî derheqê babete de hemwelatîyî hişyar kerdî.

Yurukî da zanayene ke şaristan de roje de 45-50 waqayê neweyî qewimîyenê û vat: ''Na hûmare zaf zêde ya. Dinya de jan hema zî tesîrê zafê merdiman keno. Bi hawayêkê zelalî eşkera yo ke şaristan de nîsbetê vilabîyayîşê janî zêdîyeno. Heta ke jan nêqedo ma tedbîranê xo bigêrê.''