Merkezê Xeberan - Platformê Kede û Demokrasîyî yê Dêrsimî vera zextê serê hunermendanê muxalîfan Meydanê Seyîd Rizayî de eşkerayîyêke daye. Hunermendê Dêrsimijî zî tewrê ci bîyî. Eşkerayî de wina ame vatene:  Endamanê Grup Yorumî vera zextî hezîrana 2019î de dest pê grevê vêşanîye kerd vat rewşa înan giran a ganî cade waştişê înan bêro ca ke grevî biqedînê. Şenol Akdag û Yilmaz Çelîk zî bîlasebeb ameyî tepiştene. Mîkaîl Aslan seba qiseykerdişê Festîvala Dêrsimî ame vengdayene ke îfade bidiro. Ferhat Tunç rîyê dewayanê ke derheqê ci de ameyî akerdene surgun de yo. Derheqê Grup Munzurî de dewayî ameyî akerdene û vatişê deyîrêke înan seba 5 serran ame qedexekerdene. Deyîrî hiş nêkenê û govendî do dewam bikerê. Deyîrî ziwanê şarî yê û heta ke şar est bo do ê zî bibê. Êyê ke deyîranê şarî virazenê, hêzê kesî nêeşkeno vengê înan bibirno. Êyê ke deyîranê şarî virazenê, înanê ke qanûnan vejenê ra xurtêr. Îqtîdarî yenê şinê, nameyê ci zî nêmaneno la deyîr û hunermendê şarî tim ciwîyene."

Eşerayîye bi nê vatişan qedîyaye: "Ma sey Platformê Kede û Demokrasîyî yê Dêrsimî paştî danê waştişanê biheqî yê grevê vêşanîye yê. Ma tîya ra veng danê hukmatî ke wa zulmê vera Grup Yorum û hunermendanê muxalîfan sey caardişanê destbendkerdiş, tepiştiş, zextê polîsan û qedexeyan hînî biqedîno."