Vajîyeno ke Murat Yildizo ke 2 rojî verî keyeyî ra vejîya û şi ware hêrişê hewayî de merdo. Babîyê Yilmazî vat: ''3 panzeran wesayîtê lajê mi teqîb kerdo.''

Dewa Kilmerî ya qezaya Pulurî ya Dêrsimî de Murat Yildiz (28) 7ê gulane de seba ke heywanan rê cayêk virazo pê wesayîtê xo keye ra vejîya. Yeno parekerdene ke Murat Yildiz herêma mabênê Axdad-Işikvuranî de hêrişê hawayî yê dewleta tirke de kişîyayo.

Fermandarîya Cendirmeyan a Pulurî venga keyeyê Yildizî da ke Dezgehê Tipê Edlîyî yê Meletî de seba testê DNA numûneyê gonî bido.

Babîyê Muratî Mazlum Yildizî Ajansê Mezopotamya rê qisey kerd û vat: ''Lajê mi keye ra vejîya û ma hînî tira xeberêke nêgirewte. 3 panzeran lajê mi teqîb kerdo. Şahîdan wina vat. Wexto ke mi dewe de heywanî çêrnayêne keso neşinas ame mi het û vat ke wesayîtêko vêşaye ameyo berdene bi Pulur û tede 3 kesî zî estbîyê. Mi modelê wesayîtî pers kerd, ê kesî zî vat taksî yo la serê wesayîtî pê xeyme girewte bîyo.''

Babî Yildizî pare kerd ke ê do şorê Meletî numûneyê gonîye bidê û vat: ''Wesayît nêşinasîyayêne, tira çîyêk nêmendbi. Leşkeran vat ke kesê ke wesayît de bîyî guleyî eştî helîkopterî û nînan ra kesêk zî seqat bibi. La înan senî dî ke zereyê wesayîtî de keso seqat esto? Ma vanê qey çewî ê îxbar kerdî.''