Roniştoxanê deweka Bira Zeyna ya qezaya Pasûrî ya Amedî ard ziwan ke 10 serrî yo ceyranê înan çin o la ê faturaya ceyranî danê.

Deweka Temiranê Kebîrî ya deweka Bira Zeyna ya qezaya Pasûrî ya Amedî de  10 serrî yo meseleya ceyranî est a. Bira Zeyna 1994 de bi bahaneya 'asayîşî' amebî vêşnayene û dewijî neçare mendî ke koç bikerê. 2002 ra dima dewijan dest pê agêrayîşî kerd. Deweke de 12 xaneyî est ê la seba ke ceyran bi voltajê şenikî dîyeno dewe tim birîyeno.

Muhammed Mustafa Bayramo ke 2002 ra dima agêrayo deweke îfade kerd ke seba ke voltaj şenik o eşyayê înan ê elektronîkî zî zerar vînenê û vat: ''DEDAŞ sebebê ney o 2002 ra nata tek xete ra ceyran dano ma. Nika yew dolaba cemedî 15-30 hezar lîra ya. Ma nêeşkenê ceyranî bişuxilnê la faturaya ceyranî danê. Wa na mesele bêra çareserkerdene.''

Faîke Bayram pare kerd ke domanê ci yo 11 serre nêweşê astimî yo û vat: ''Wexto ke rewşa ey beno xirab ma makînaya astimî şuxilnenê la zimistanî nêeşkenê makîna bişuxilnê çunke ceyran çin o. Ma 20 hezar lîra da, dolaba cemedî girewte la ceyranî ra xeripîyaye. Rixmê nê meseleyan zî ma her aşme faturaya xo danê. No pereyo ke ê ma ra gênê, heram o.''

Roniştoxê bînî Şakîr Bayramî dîyar kerd ke ê nêeşkenê dolaba xo ya cemedî bişuxilnê û vat: ''Domanî şinê dibistane la tarî de nêeşkenê ders bixebitê. Seba çareserîya mesele ma çend reyî muracat kerd la çewî çîyêk nêkerd. Ya ceyran bêro dayene ma yan zî wa bi temamî bêro birnayene. Ez çira ceyrano ke nêeşkena bişuxilna faturaya ci dana?''