Merkezê Xeberan- Dewanê Midbaxa, Mezrexa Mala Hemdoş, Dawudiye, Dirdara, Mubarekiye, Mirekis û Sikkeriye yê qezaya Zirganî ya Serêkanî şewa Yewşemeyî ra nata bombarduman benî. Obus û tankan û teyarayanê şerî yê bêmerdimî hêrişan de ameyî xebitnayene.

Dewa Mubarekîye de şervananê HSD cewabêko pît da hêrişan û netîce de 30 çekdarî ameyî kiştene û di wesayîtê ke hêriş de ameyêne xebitnayene, ameyî îmhakerdene.

Dewanê bînan de zî şer qewimîyeno û îşxalkaran ra kişteyî û birîndarî estî, la netîce nêame tesbîtkerdene. Hêzanê işxalkaran xîret kerd ke bikewê  dewa Midbaxî û şervananê HSD cewab da hêriş. Çeteyê îşxalkarî mecbûr mendî  ke xo tepîya biancî.

Heman wextî de verba dewanê Sali û Til Qertelî hêriş ame kerdene û her di herêman de zî şer qewimîyayo. Dewa Babil Xêrî de zî peynîya hewteyî ra nata şer qewimîyeno. Şerê Yewşemeyî de bi desan eskerê artêşa Tirkîya ameyî kiştene û tankêkê înan ame îmhakerdene.