Navenda Nûçeyan - Mûsa Ehmed da xuyakirin, ew dizanin ku alîkarîyên lezgîn ji koçberan re pêwîst in û ew hewl didin, alîkarîyan peyda bikin û bigihîn destê koçberan.

Mûsa Ehmed got, ew bi Wezareta Koç û Koçberan a Iraqê re ketine pêwendîyê ji bo ku alîkarîyên mirovî yên pêwîst ji koçberan re peyda bikin.

Serokê Dezgeha Xêrxwazî ya Barzanî herwiha dîyar kir, ew bi navenda krîzan a Herêma Kurdistanê û Wezareta Navxwe re jî di pêwendîyê de ne, ji bo ku alîkarîyê ji wan kesan re pêşkêş bikin ku di nava kampan de dijîn û nikarin derkevin derve.

Mûsa Ehmed herwiha koçberên di nava kampan de piştrast kir ku ew dê di demeke nêzîk de alîkarîyên weke xwarin û pêdawîstîyên din bigihînin koçberên Rojavayê Kurdistanê yên ku li kampan dimînin.

Ji ber metirsîya belavûna vîrusa Koronayê, Hikûmeta Herêma Kurdistanê ji 14ê Adarê ve qedexeya derketina derve ragihandîye û hemû cih û navend û sazîyên hikûmetê, cihên giştî û cihên kerta taybet jî hatine girtin.