Rêxistina Heqanê Merdiman a Rojawanî sûcê şerî yê cerganê dewleta tirke, rayaumûmîye rê eşkera kerd.

Înîsîyatîfê Pawitişê Huqûqî yê Sûrîye, Rêxistina Heqanê Merdiman a Herêma Cizîre, Merkezê Cigêrayîş û Pawitişê Heqanê Cinîyan ê Sûrîye, Merkezê Rojawanî yê Cigêrayîşanê Stratejîkan (NRLS), Yewîya Avûkatan a Herêma Cizîre û Rêxistina Heqanê Merdiman a Herêma Efrînî ya Sûrîye pê eşkerayîyêke sûcê şerî yê dewleta tirke û cerganê ci Efrîn de kerdbi, rayaumûmîye rê eşkera kerd.

Hemsereka Rêxistina Heqanê Merdiman a Herêma Cizîre Evîne Cuma eşkerayîye wende.

Eşkerayîye de nê doneyî ameyî parekerdene:

-2018 de Efrînî ra se ra 80 roniştoxan koçê Şehba, Heleb, Til Rifatî kerd.

-2018 de bombardumanan de 498 sivîlî kişîyayî, 82 kesî binê îşkenceyî de merdî, 696 kesî birîndar bîyî ke nînan ra 303 kesî doman û 213 kesî zî cinî yê.

-2018 de hêrişan de 64 dibistanî rijîyayî. Herême de têna 13 hezar wendekarî mendî. Dewleta tirke Zanîngehê Efrînî qefilna, dibistanî vurnayî qerargeh û zindan, peynîya perwerdeyê bi ziwanê dayîke ard û kerd tirkî û her kesî rê Îslam ferz kerd.

-2018 de 943 kesî ameyî remnayene, bi desan kesî pê îşkenceyî ameyî qetilkerdene.

-2018 de dewleta tirke dezgehê weşîye, nêweşxaneyî û bînayê umûmîye kerdî hedef. Nêweşxaneyê Avrînî 3 reyî, ambulansê Heyva Sor a Kurdîstanî xeylêk reyî bîyî hedef.

-2019 de 6 hezar kesî ameyî remnayene, 500 kesî pê bedelê fîdye vera dîyayî, aqîbetê 330 kesan nêzanîyeno, 700 kesan rê îşkence ame kerdene. 54 kesî zîndanan de pê îşkenceyî ameyî qetilkerdene, 41 kesî bombardumanan de merdî ke nînan ra 2 kesî rojnameger bîyî. 670 kesî bombardumanan de bîyî birîndar, 1760 kesî pê mayin û teqayîşan birîndar bîyî. 2ê kanûna 2019î de koçberê Til Rifatî ameyî hedefkerdene û nê bombardumanî de 8ê ci domanî 10 sivîlî kişîyayî û 9ê ci domanî 17 sivîlî birîndar bîyî.

-2019 de Efrîn de 40 cinîyî kişîyayî, 128 cinîyî birîndar bîyî, 60 domanê kênayî maruzê îstîsmarê cînsî bîyî. 9ê ci cinîyî 58 sivîlî ameyî qetilkerdene, 987 kesî ameyî remnayene, 39 teqayîşî qewimîyayî û netîce de 170 kesî kişîyayî û birîndar bîyî.

-2020 de 35 cinîyî ameyî remnayene, 67 cinî û domanê kênayî maruzê îstîsmarî bîyî, 5 cinî û domanê kênayî bi zorî dayî zewijnayene.

-2021 de heta nika 153 sivîlî ameyî remnayene, nînan ra 4ê ci domanî 15 kesî ameyî qetilkerdene. 3 hezar zeytûnêrî ameyî birnayene, 15 cayê tarîxî ameyî texrîbkerdene.

Evîne peynîya eşkerayîye de da zanayene ke Efrîn de têna 7 hezar kesî mendî û bale ante sûcanê vera xoza ser. Evîne vat Efrîn de heta nika 315 hezar darî birîyayî û 10 hezar hektar daristan ame vêşnayene.

Evîne ard ziwan ke cayê fîrazî û cayê îbadetî zî ameyî talankerdene û texrîbkerdene.

Evîne peynî de venga komelê mîyanneteweyî, Neteweyanê Yewbîyayeyan û rêxistinan da ke wa sûcan û îşxalê dewleta tirke vindarnê, nê sûc û îşxalan îsbat bikerê û dewleta tirke cerganê ci reyde muhakeme bikerê.''