Kitabê Jonh Steinbeckî yê ‘Merreyî û Merdimî’ û kitabe Goetheyî yê ‘Dejê Wertherê Ciwanî’ açarîyayê kirmanckî ser.

Edebîyatê kirmanckî çend şino xurt beno. Serranê peyênan de berhemê serkewteyî ameyê nuştene. Nika zî hinî dore ameya berbemanê klasîkan. Pêardişê berhemanê orîjînalan xeylê muhîm o la ganî berhemê verênî û klasîkî zî bêrê açarnayene û wendene. Raşta zî no derheq de kirmanckî de venganîyêka pîle esta. La tayî xebatê başî zî yenê kerdene. Kitabê John Steinbeckî yê ‘Merreyî û Merdimî’ hetê Sezgîn Firatî ra ameyo açarnayene û kitabê Goetheyî yê ‘Dejê Wertherê Ciwanî’ zî hetê Jêhatê Zengelanî ra ameyo açarnayîş. Nê her di kitabî zî ziwananê xo yê orîjîlan ra ameyê çarnayene. Kitabî Weşanxaneyê Avestayî ra vejîyayê. Eke şima wazenê nê berhemanê klasîkan bi kirmanckî biwanê, nê kitaban peyda bikerê.

John Steinbeck, Merreyî û Merdimî (Açarnayox: Sezgîn Firat), Weşanxaneyê Avesta, Îstanbûl, 2021.
Johann Wolfgang Goethe, Dejê Wertherê Ciwanî (Açarnayox: Jêhatê Zengelan), Weşanxaneyê Avesta, Îstanbûl, 2021.