Merkezê xeberan

Netewê Yewbîyayî aşkera kerd ke, seba ke hetanî serra 2030 koledarî bêra qedînayene ganî her roje 10 hezar merdimî koledarîye ra bêrê azadkerdene. Goreyê Netewê Yewbîyayî dinya de 40 mîlyon merdimî sey koleyan ê.

Raportora Taybet a babeta koledarîye ya Netewê Yewbîyayî Ûrmîla Bhoola bi beyanatêk aşkera kerd ke,  peynîya şeş serran ê wezîfeyê xo de a bixemgînî pare kena ke seba ke koledarîye wedarîyo kare înan hema zaf o.

Bhoola îzeh kerd ke, heta serra 2030î seba ke koledarîye dinya ra wedarîyo ganî zaf karî bêrê kerdene û naye ra ganî rojêk de 10 hezar merdîmî bêrê azadkerdene.

Bhoola raporêk pêşkêşê Konseya Heqanê Merdiman a Cenevre kerd û da zanayene ke dinya de 40 mîlyon merdimî binê şert û mercanê koledarîye de yê û beno ke na hûmare hîna zêde biba.

Goreyê raporê Bhoola dinya de se ra 64 koleyî hetê sektoranê taybetan ra yenê xebitnayene. Heman wextî de çar baran ra yewê înan zî doman ê. Cinîyê binê şert û mercanê koledarîye de yê se ra 98 benê hedefê şîdetê cînsîyî. Rapor de ame eşkera kerdene ke 24 mîlyon gêncê ke welatanê averşîyayen û kêmaverşîyan de kewenê karî, beno ke bikewê binê şert û mercanê koledarîye. Goreyê raporî welatê Neteweyê Yewbîyayeyî ganî lezûbeze verba na rewşe de tê bigêrê.