Şewa bîne Mîyanê Sûrî yê qezaya Dîyarbekirî de bi beşdarîya xeylêk kesan “Şewa Deyîr û Şîîranê Kirmanckî” ( Zazakî) virazîya. Şewe de deyîrî ameyî vatiş, şîîrî ameyî wendiş.

Roja 17ê Kanûne de Dîyarbekir de hetê Grûba Morceleyê Kirmanckî ra bi nameyê “Şewa Deyîr û Şîîranê Kirmanckî” şayîke virazîya. Xeylê heskerdoxê Kirmanckî ameyî şayîye û desteg dayê ci.

Grûba bi nameyê “Morceleyê Kirmanckî” a ke semedê Kirmanckî/ Zazakî şayîyan û çalakîyanê cîya bi cîyayan virazena şewa bîne zî Dîyarbekir de karêko rind kerd û bi wesîleyê “Şewa Deyîr û Şîîranê Kirmanckî” xeylê heskerdoxê Kirmanckî” ardî têhet.

Destpêkî de semedê Endamê Grûba Xebate ya Vateyî Mehmûd Nêşite û Munzur Çemî ê ke demo peyên de dinyaya xo bedilnabî sînevîzyonêke dîya temaşekerdene.

Badê cû xebatkaranê Grûba Morceleyê Kirmanckî ra Ugur Sermîyanî qiseykerdişêk kerd. Sermîyanî va: “Ma roja ke grûba xo awan kerde ma waştbî her aşme çalakîyanê sey konser, panel û semîneran organîze bikê. La rîyê tay sebeban ra ma nêeşkê. Bi taybetî zî sebebê sey Pandemî ra ma nêeşkê nê waştişê xo bîyarê ca û ma yewbînan ra dûrî kewtê. Seke şima zanenê di ercê ma Endamê Grûba Xebate ya Vateyî Mehmûd Nêşite û Munzur Çem dinayaya xo vurînayê û mîyanê ma ra şîyê. Coka ma ewro bineyke xemgîn ê. Munzur Çem çend çen rojî verê cû mîyanê ma ra şi. Ey ra ver zî mîyanê ma ra mehmud Nêşite şibi rehmet. Coka ma mîyanê xo de mişewre kerd ke ma na çalakî betal bike. La ma fikrîyayê ke eke ê her di mamosteyê ma mîyanê ma de bibîyêne waştêne ma na çalakî viraze. Çimkî feydê na çalakî kirmanckî rê esto. Aye ra ma betal nêkerd.”

Badê pey M. Malmisanij o ke semedê hetkarîya xebata ciwanan amebi şayîye zî semedê qiseykerdişî ame dawetkerdene. M. Malmisanij semedê qiseykerdişî warişt we, mîkrofon girewt xo dest la semedê wefatê Mehmûd Nêşite û Munzur Çemî, semedê wefatê her di dostanê xo zaf xemgîn bi, çimê ey bîy pirr û tenya eşka vajo “Wa rûhê înan şad bo, ez seva vajî.”

Badê cû şayayîye dest pêkerde û deyîrbaz Xoserî pê gîtarê xo çend deyîrê zazakî vatî.

Badê cû zî hunermend Eylul Nazlier pê sazê xo çend deyrê zazakî vatî.

Tewr peynî zî Omer Barasi mêmanan rê şîîrî wendî

Çimê: Amida Haber

https://amidahaber.com/kurdi/heskerdoxe-zazaki-sewa-deyir-u-siiran-de-ameyi-tehet-882h