Serokê Amerîkayê ragihand ku wî negotiye dê hêzên Amerîkayê ji Sûriyeyê vekişin û got, “Ez nizanim çavkaniya van nûçeyan çi ye.”

Serokê Amerîkayê Donald Trump doh li Koşka Spî pirsên rojnamegeran bersivandin.

Donald Trump anî ziman:

“Min negotiye em dê hêzên xwe ji Sûriyeyê derxin û ez nizanim çavkaniya van nûçeyan çi ye.”

Donald Trump da zanîn ku ew dê li ser çarenivîsa hêzên xwe yên li Sûriye û Rojavayê Kurdistanê biryarekê bidin.

Trump tevî ku red kir wî behsa vekişîna hêzên xwe yên ji Sûriye û Rojavayê Kurdistanê kiriye jî amaje pê kir ku îdareya wî dê li mijara mayîna hêzan bifikire û got:

“Em dê li ser vê mijarê biryarê bidin.”

Donald Trump bal kişand ku ew beşdarî rûdanên li Sûriyeyê nebûne û da zanîn:

“Sûriyeyî bi xwe ji vê rewşa niha berpirsyar in.

Ti eleqeya Amerîkayê pê nîne û ew naxwazin ku Amerîka beşdarî vê rewşê bibe.”

Gotinên Serokê Amerîkayê piştî wê hat ku rojên borî, medyayên Tirkiye û Îsraîlê nûçeya ku Donald Trump, ji berpirsên Îsraîlê re gotiye ku ew dixwaze hêzên xwe ji Sûriyeyê vekişîne, belav kiribû.