Siyasetmedarekî kurd dibêje, eger PKK û PYDê rêkeftinên Hewlêr û Duhokê bicîh anîban rewşa Rojavayê Kurdistanê bi vî rengî nedibû.

Siyasetmedarê kurd dr. Mihemed Salih Cumhe li ser rewşa Rojavayê Kurdistanê ji BasNewsê re axivî û got, niha tehdîdek mezin li ser Rojavayê Kurdistanê heye û Tirkiye dixwaze dîsa êrişî wê herêmê bike û dagîr bike. Helbet PKK li hember vê rewşê berpirsiyar e.

Dr. Mihemed Salih Cumhe her wiha got, PKK û hemawazên wê li wî parçeyê Kurdistanê xizmeta gelê kurd nakin û ti kes jî qebûl nakin. Kî bi wan re nebe, qebûl nakin ji ber ku tenê xwe dibînin û ji bilî xwe ti kesekî din qebûl nakin.

Li ser hewlên Serok Barzanî bo yekrêziya kurdan li Rojavayê Kurdistanê jî wî siyasetmedarê kurd got, Serok Barzanî û PDK her dem siyasetek rast meşandine û xizmeta kurdiniyê kirine lê PKK û yên girêdayî wê, kurdiniyê naxwazin û guh nadin ti kesî. Kar û reftarên PKKê bûn sebeb ku Tirkiye deverên mîna Serê Kaniyê, Girê Spî û Efrînê dagîr bike, niha jî dixwaze deverên din dagîr bike.

Bi gotina wî siyasetmedarê kurd, PKK bi her kesî re rûdinê û hevdîtin dike lê bi hêz û aliyên kurdî re nake. Divê PKK li xwe vegere. Ew xizmeta dijminan dikin. Heta niha gelek caran êrişî ofîs û baregehên partiyên din kirine û xelkê digirin û direvînin. Bi rêjîma Sûriyê re rûdinên. Qendîl çi bêje li Sûriyê tê bicîhanîn. Ev jî bûye sebeb ku kurd rastî ziyanên mezin bên.  Ew bûne sebeb ku kurd li Sûriyê lawaz bibin û her carê jî deverek bikeve destê Tirkiyê.