Çarçeweya kampanyaya tabletî yê dersê weçînitî yê kurdkî ke hetê Odeya Bazirganî û Sanayî  (DTSO) ra ame destpêkerdiş de, wendekaran rê 1150 tabletî ameyî dîyarîkerdiş.

Kampanyaya DTSO'yî ke seba wendekaranê ziwanê kurdkî weçînitê dewam kena. Na rey waendekaran rê tabletî vila bîyî. Semedê vilakerdişê tabletan şewa bîne Çand Amed (Merkezê Kongreyî yê Sezaî Karakoçî) de merasîm ame viraştiş.

Hemşaredarê Şariştanê Girdî yê Amedî Dogan Hatun, Hemşaredara Yenîşehîrî Safîye Akdag, serekê DTSO'yî Mehmet Kaya û temsîlkarê rêxistinanê sivîlan û wendekarî beşdarê programî bîyî.

Serekê DTSO'yî Mehmet Kayayî zî derheqê ziwanê dayîke de qisey kerd û 700 wendekaran rê tabletî vila kerdî.

Şewe de Hemşaredarê Amedî yê Şaristanê Girdî Dogan Hatunî dîyar kerd ke ê do seba ziwanê dayîke hertim paştî bidê

Hemşaredar Dogan Hatun bale ante mihîmîya ziwanê dayîke ser û va; "Ma sey Şaredarîya Bajarê Girdî yê Amedî do wayîrê ziwanê xo vejîyê. Ma do bi 17 şaredarîyanê xo kam bi ziwanê dayîke biwazo ke xebate biko, biwazo kursêk akero, ma do hemînan rê paştî bidê. Ma tîya ra sozê ci danê. Ma sozê ziwanê xo danê. Her dare kokê xo ser o yena, însanî zî bi ziwanê xo est benê. Gedeyî eşkenê 2-3 ziwanan pîya bimusê, eşkenê tirkî, îngîlîzkî erebkî bimusê qet probleman nîyo la eke ziwanê dayîke zî nêmusê no problem o."