Endamê Polîtburoya Partiya Demokrat a Kurdistanê-Sûriye (PDK-S) Ebdulhekîm Beşar ji Rûdawê re got ku ew beşdarî Kongreya Diyaloga Niştimanî ya Sûriyeyê nabe.

Kongreya Diyaloga Niştimanî ya Sûriyeyê îro li Şamê dest pê dike û dê 2 rojan berdewam bike.

Komîteya Amadekar a Kongreyê ragihand ku kongre dê îro mêhvanan pêşwazî bike dê sibe jî dest bi karê xwe bike.

Ebdulhekîm Beşar ji Rûdawê re got ku ew û Seroka Nûnertiya Ewropayê ya ENKSyê Necah Hêvo û her wiha Nûnerê ENKSyê yê Komîteya Pêwendiyên Derve ya Eniya Aştî û Azadiyê Hewas Egîd wekî kes ji bo beşdarî Kongreya Diyaloga Niştmanî ya Sûriyeyê bibin hatine vexwendin lê wan biryar daye ku beşdarî kongreyê nebin.

Ebdulhekîm Beşar eşkere kir ku Encûmena Niştmanî ya Kurd a Sûriyeyê (ENKS) dê îro bi daxuyaniyekê helwesta xwe diyar bike.

Nûnerê ENKSyê yê Komîteya Pêwendiyên Derve ya Eniya Aştî û Azadiyê Hewas Egîd jî ji Rûdawê re got ku ew wekî kes hatine vexwendin lê ew beşek in ji tevgera siyasî ya Kurdan.

Hewas Egîd got ku ji dema amadekirina Komîteyê ve gelek têbîniyên wan li ser Kongreya Diyaloga Niştimanî hene û ew di wê baweriyê de ne ku endamên beşdar dê nikaribin di 6 demijmêran de dosyeyên giring ên wekî pêvajoya siyasî, destûr û dadmendiya veguhêz gotûbêj bikin.

Berdevkê Komîteya Amadekar a Kongreya Niştimanî ya Sûriyeyê Hesen Dixêm ragihandibû Kurd dê wekî kes bi navê xwe lê ne wekî şandeyekê beşdarî kongreyê bibin.

Li gorî agahiyên ku Komîteya Amadekar a Kongreyê dane Rûdawê, derdora 400 heta 600 kesî dê beşdarî kongreyê bibin.

Li hêla din, Komîteya Amadekar a Kongreya Diyaloga Niştimanî ya Sûriyeyê beyî hebûna Kurdan hat avakirin.

Komîte 11ê Sibata 2025an bi biryara Serokkomarê Sûriyeyê Ehmed Şer hat avakirin, ev komîte ji 7 kesan pêk tê lê di nav wan de Kurdek jî nîne.