Cenazeya Efe Tektekîno 6 serre yo ke wesayîtê zirxînî yê polîsan da piro û merd amey definkerdiş. Babîyê Ahmet Tektekînî va: ‘‘Lajê min o 6 serre verê çimanê mi de  merd. Yew serre cuya ver zî polîsan pê TOMA babîyê mi kişt."

Cenazeya  tuto 6 serre Efe Tektekîno ke polîsan pê wesayîtê zirxînî cehdeyê Emekî ya taxa 5 Nîsane ya qezaya Rezanî ya Amedî kişt Goristanê Yenîkoyî de ame definkerdiş.

Efe Tektekîno 6 serre yo ke 11’ê Êlule de qezaya Rezanî ya Amedî de wesayîtê zirxinî yê polîsan o eciqnabi û Nêweşxaneyê Fakulteyê Tipî yê Dîcle de ameyêne tedawîkerdene cuya xo vînî kerde.

Dimayê otopsîya Nêweşxaneyê Dewlete yê Selahattîn Eyyûbî cenazeya Tektekînî Goristanê Yenîkoyî de ameye definkerdiş.

Wexto ke cenaze morga nêweşxaneyê dewlete ra girewtêne Babî Ahmet Tektekînî  reaksîyon da polîsan ke pê wesayîtê zirxînî lajê ey kişto û va: "Wesayîtê polîsan bi hewayêko eşkera lajê mi qetil kerdo. Lajê mi 6 serre bi, mêse û vizik nêbi. Çi gureyê wesayîto zirxîn tîya de esto? Polîsan senî lajê mi uca de nêdîyo? Yew serre cuya ver zî wesayîtê TOMA mîyanê roje de nêvindert û babîyê mi qetil kerd.

Şahidê serebûtî merdimê  Tektekînî ke nêwaşt nameyê xo eşkere biko va: "Hem kişenî û hem zî bêveng manenî. Polîsan şahidê hedîse yê ke fotofrafî antî destbend kerdî." Keyeyê Efeyî otopsî ra pey cenazeya ey ard Goristanê Yenîkoyî û tîya de vecîbeyanê dînî ra pey defin kerd.