Efrîno ke binê îşxalê  dewleta Tirkî de yo her roje sîvîlî yenê remnayîş. Nê rojanê peyênan de 9 sîvîlê bînî amey remnayîş.

Çekdarê Feyleq El Şam ê ke dewleta Tirkîya ra paştî gênê roja Îneyî dewa Dêrbelûte ya qezaya Cindirêsî ya Efrînî  de 9 sîvîlî remnayî. Cayê sivîlanê ke ameyî remnayîş nêno zanayîş

Goreyê çimeyanê herêmî sivîlê ke ameyî remnayîş nameyê înan nê yê; Mihemed Menan Silêman, Mihemed Mihemed Silêman, Loqman Mihemed Abdo, Ehmed Wehîd Şiko, Îsmaîl Şêx, Bekir Mihemed Belker, Cihad Mihemed Xelîl, Şêxmûs Reşid Tahir û Mehmûd Mihemed Izat Fatume.

Mîyanê 12 Rojan de Tewr Tay 61 Sivîlî Ameyî Remnayene

Dewa Kefer Sefre de zî 10'ê Êlule de 14 hebî sivîlî ameybî remnayîş. Sivîlî hetê çeteyanê Tûgaya Semerkante yê  ke  pabesteyê dewleta Tirkîya yê ra ameyî remaneyîş.

Roje çin a ke sivîlî nênê remnayîş. Destpêkê menga Temmuze ra nata bi sayan sivîlî ameyî remnayîş. Yeno vatene ke mabênê menganê Temmuze û Tebaxe de hûmara sivîlan ê ke ameyî  remnayîş 500 kesanî ra zêdêr a. Destpêkê menga  Êlule ra nata tewr kêmî 61 sivîl ameyî remnayîş. Yeno texmînkerdene ke hûmara raşteqîne ney ra zêdêr a.

Efrîn de Sucê Merdimîye Yenê Kerdene

Efrîn hetê dewleta Tirkîya û çekdaranê girêdayîyê ci ra ra ame îşxalkerdene. Dewleta Tirkîya 20'ê Çeleyê 2018'an de dest bi hêrişê îşxalkerdişê Efrînî kerd û 18'ê Adare de şaristan îşxal kerd. Wextê îşxalkerdişî ra nata sucê şerî yenê kerdene. Her roje malê sivîlan yenê destsernayene, sivîlî semedê fîdye yenê remnayene, sivîlan rê îşkence yeno kerdene yan zî sivîlî yenê kiştene.