Efrîn de eskeranê Tirkîya û grûbê ke seba Tirkîya Efrîn de falîyet kenê, mîyanê 20 rojan de 300 sivîlî remnayî.  

Efrîn de eskeranê Tirkîya û grûbê ke seba Tirkîya Efrîn de falîyet kenê, mîyanê 20 rojan de 300 sivîlî remnayî.  

Organîzasyonê Heqanê Merdiman ê Efrînî derheqê hedîseyê remnayîşan de beyanat da. Organîzasyon belgeyanê xo seperneno çimeyanê bibaweran û şahidan. Goreyê belgeyanê organîzasyonî destpêkê îşxalê kantonê Efrînî ra nata 5 hezarî ra vêşêr kes ameyo remnayene û aqûbetê di hezaran kesan zî bewlî nêyo. Hêzanê îşxalkaran seba veradayîşê kesanê ke remnayê fîdye keyeyanê înan ra wazenê.

'Rojane Sivîlî Yenê Remnayene‘

Goreyê Organîzasyonê Heqanê Merdiman ê Kantonê Efrînî mîyanê 20 rojanê na menge de (Temmuze) 300 ra vêşêr sivîlî ameyê remnayene. Organîzasyonî nameyê kesanê ke ameyê remnayene û tarîxê ameyîşremnayîşê înan zî belge kerdî. Vervatoxê Organîzasyonê Heqanê Merdiman ê Kantonê Efrînî Îbrahîm Şêxoyî ard ziwan ke kesê ke ameyê remnayene serê wucûdê înan de şopê îşkenceyê fîzîkkîyî û ruhkîyî yenê dîyene û seba veradayîşê înan keyeyanê înan ra fîdye yeno waştene.

Hetêna ra Organîzasyonê Heqanê Merdiman ê Efrînî şewatê bax û baxçeyanê sivîlan zî belge kerdî. Goreyê belgeyî artêşa Tirkî ya îşxalkare 5’ê Temmuze de 200 ra vêşêr darî Efrîn de û 17’ê Temmuze de zî qezaya Şêrawa de adir na 300 ra vêşêr hêgayê genim û cewî.  Goreyê Organîzasyonî 15’ê Temmuze de artêşa Tirkîya û grûbê çekdarî qilê qezaya Cindirêsî  de perçeyê tarîxîyî diznay. Heman wextî de serê qilî de bargehêko eskerî awan kerd.