Grûbê çekdarî êyê ke dest ronayê bajarê Kurdan Efrîn ser o şarê Kurdî rê zulme xo domnenê. Çekdaran na rey banê her di welatîyê ke hewteyêk verî bi guleyan ameybî qetlkerdene talan kerd.

Teşkîlatê Heqanê Merdiman yê Efrînî aşkera kerd ke vizêr 16ê Hezîrane de polîsê eskerî û grûbê çekdarî banê her di welatîyan Ebdilrehman Şêx Bilal û Henan Husên êyê ke hewteyêk verê cû  rayîrê Efrîn-Raco ser o ameybî kiştene talan kerd.

Nê teşkîlatî îzeh kerd ke, wexto ke keyeyê Kurdan taziye de bî, çekdaran eşto banê înano ke mehleya Eşrefiye de c gêno ser û banî pêro talan kerdî.

Vajîya ke polis û çekdaran kamyonêk arda verê banî û pêro malzemeyê ke banan de bî barê kamyone kerdê û xo de berdê.

8ê na menge de 2  xortê Kurdan Ebdilrehman Şêx Bilal û Henan Husên, wexto ke Efrîn ra şîyêne qezaya Raco, deşta Kitixî de bi guleyan ameybî qetlkerdene.