Encûmena Niştimanî ya Kurd li Sûriyê (ENKS) revandina rojnamevan Ehmed Sofî li gundekî Dêrikê bi tundî şermezar kir û got: “PYD bi van kiryaran yekrêziya helwesta kurdî, azadiyên ragihandinê û siyasî li deverên di bin destê wê de dike armanc.”

ENKSê îro 3ê Nîsanê di daxuyaniyekê de ragihand, “Çekdarên ser bi PYDê ve rojnamevan Ehmed Sofî ku endamê Partiya Demokrat a Kurdistanê – Sûriyê ye, dema ku ligel malbat û hevalên xwe ji bo sersaxiyê diçû ji gundekî Dêrikê revand.”

ENKS revandina rojnamevan Ehmed Sofî û got, “PYD bi van kiryaran yekrêziya helwesta kurdî, azadiyên ragihandinê û siyasî li deverên di bin destê wê de dike armanc, ku hewl dide her dengekî ku rexne li kiryarên wê li dijî xelkê û têkçûna wê digire, bêdeng bike.”

ENKS di daxuyaniya xwe de tekez dike ku revandina rojnamevan Ehmed Sofî, binpêkirina mafên mirovan û pîvanên exlaqî ye. Herwiha daxwaz ji Hevpeymaniya Navdewletî kir jî ku “destêwerdanê bike ji bo azadkirina rojnamevan Ehmed Sofî û parastina selametiya wî, rawestandina kiryarên serkutkirinê yên rêveberiya PYDê yên li dijî sivîl û medyakaran û rêz li azadiya derbirîn û ramanê bigire.”

Di çend rojên borî de û li gorî daxuyaniyên cuda yên ENKSê, “Şeva 29ê Adara borî rojnamevan Rakan El-Ehmed, herwiha roja 1ê Nîsanê jî medyakar û endamê Xwecihiya Girkê Legê yê ENKSê Merwan Liyanî ji aliyê komên çekdar ên ser bi PYDê ve li bajarokê Gerkê Legê hatibûn revandin.”

(K24)  

Rakan Ehmed