Enwer Yilmaz

Ma mîyanê Aşma Remezanî ya bimbareke de yê. Homa ayê ke roje gênê, rojeyê înan qebûl biko.

Sey her qismê cuyayîşî, Aşma Remezanî zî sey serranê verînan rîyê nêweşîya Korona ra bêtehm a emser zî. Xora par ra nat na nêweşî pêruna dinya de bîya sebebê zerarêkê pîlî. Hem hetê madî hem zî hetê manewî ra zerarêko pîl resayo qewma însanan. Hetêk ra Bİ rojane hezaran merdimi mirenê hetêk ra pê nêweşî kewenî û hetêk ra zî semedê tedbîran şar betal maneno, dikananê xo qefilneno, tengayî anceno…

Aşma Remezanî de demê fitarî semedê însanan zaf muhîm o. Mitbax de çi esto çi çin yo ancîyeno sifreyan ser û yeno werdiş. Demê fitarî de teber de kes nêmaneno. Ayê ke roje gênê ayê ke nêgênê dorûverê sifreyan de yenê pêser û vengê melayî pawenê.

Korona ra ver milet yewbînî dawet kerdêne keyeyanê xo û pîya fitarê xo akerdêne. Semedê têhetameyîşî zî akerdişê fitarî aktîvîteyêka muhîme bîy. La seke mi va, par ra nata kes nêşino keyeyê kesî û her kes keyeyanê xo de fitarê xo akeno.

Roje, tena girewtişê fekî nîyo semedê ayê ke bawer kenê û roje genê. Roje de çî-mîyê pîsî benî kêmî. Herednayê benê haşt û yewbînan rê ardimkerdiş, îkram û mêmamî vejyenê ver. Ayê ke dewlemend ê, desttengan rê ardim kenê. Kesê desttengî na aşme de kêm-zêde xo rê ardiman arêdanê.

Roje de gere merdim qelbê çewî nêşikno, nengan nêçîyo, çewî rê heqeret nêkero, peyê çewî de qisey nêkero. Yanê zerrîya xo gere pak bigîro. Usulê îbadetî xora nê yê. Gorê mi çîyo tewr muhîm zekat û fitir ê na aşma bimbareke de. Gere kesê feqîrî bêrê tespîtkerdiş, gorê sereyê her merdimi fitir bêra weşkerdiş. Xora ayê ke dewlemend ê gere gorê hesabkerdişê mal û milkê xo zekata xo bidê. Dest bierzê feqîran.

Fermanê dînê Îslamî wîna yo.

La aya ke bena wîna ya gelo?

Ez zana şima zî zerrîya xo ra vanê ney!

Ne ayê ke roje gênê zafê înan zerrîya xo pak gênê, ne dewlemendî gorê şertanê îslamî zekata xo danê û ne zî kesanê desttengan rê ardimêko cîdî kenê.

Eke pêrûna Rojhilatê Mîyanînî de, mîyanê mislimanan de Ayê ke dewlemend ê feqîran rê ardim bikerdêne, dewletî hetê dizdan û zaliman ra nêamêne îdarekerdiş, yew tek feqîr nêmendêne rîyê erdî ser  de.

Her kes şertanê Îslamî zano. Şertê îslamî tena nimaj, hec, zekat û rojegirewtiş  nîyê. Eke merdim weş fehm biko şertî hîna hîra yê. Eke merdim pîs bo, temakar bo, çikus bo, zulumkar bo, fekê ey pîs bo, dewlemend bo la feqîran rê ardim nêkero, botan biko, raştîyan nêvajo, welatê xo, însananê xo û keyeyê xo rê pîs bo gorê mi ê şertan bîyaro ca zî bîlesebeb o.

Çi heyf ke welatanê Rojhilatê Mîyanînî de zulum, dizdî, bêedeletî, feqîrî û yewbînan rê dişmenetî bîyê perçeyekê heyatî.

Eke bêro qisekerdiş, înan rê weş, raşt û edeletin sewbîna cayêkê dinya de kes çin o. Eke ti înan rê vajî bê înan her kes şino cehennem tena ê şinê cenet.

Eke ma welatê Tirkîya nimune bide xora tu eleqeyê înan bi mislimantî çin o. Dewleta Tirkîya pê îslamê sîyasalî yena îdarekerdiş. Û îslam tena semedê înan malzemeyêkê xapînayîşî yê ser şarî yo.

Dewleta Tirkîya ne heqanê şaran ne zê heqanê bawerîyanê bînan nas kena û pê polîtîkayanê xo kena ke heminan çîne biko.

Tirkîya de dewlemendî zaf dewlemend, feqîrî zaf feqîr ê. Gorê îstatîstîkanê înan ê zûran zî gêncan ra se ra 27ê xo betal ê. Êyê ke dewlete îdare kenî mîyanê keyf û weşî de, mîyanê koşkan de cuyenê. Şar pêro deyndarê banqayan o û sibarojê şarî bewlî nîyo. Ciwanî bîlasebeb unversîteyan waznenê. Û çîyo en giran zî qismêk zî estî çopan ra pîzeyanê xo kenê mird.

Tay çî estî ke merdim pê çimanê xo vîneno. Eke mi zî pê çimanê xo nêvînayêne mi nê çîyî nênuştêne muheqeq.

Ez çend rojî verê cû raştê çîyêk ameya ke bi rojan ez pê belqitîyaya û hema zî çend saetan ra hewe çîyo ke ez şahîdê ci bîya yeno çimanê mi vera.

Ez Dîyarbekir de cayêk ra vîyartêne cinîyêk kuwa mi çiman ver. Ez ewnîya ha çopêk ser o, deste aye mîyanê çopî de... Kênayêka qijkeke zî ewnîyena dorûverê xo ra. Mi nêwaşt wa mi ferq biko ke bişermîyo. Cinî mîyanê çopî ra çî-mîyo ke yeno werdiş arêda, eşt mîyanê torbeyêk, ewnîya dorûverê xo û destê kênaya xo girewt û şî...

Gelo însanêk keyfê xo ra şino mîyanê çopî ra nan arêdano!

Ez bawer nêkena. Eke a cinî feqîr nêbîyêne, eke keyeyê aye de nanê aye bibîyêne çi rey nêşîyêne mîyanê çopan ra nan arê nêdêne. Xora bewlî bi ke şermîyêne. A kêna… A kênaya qijkeke û çimgilore û sîya şewe zî yena hewnanê mi…

Gelo sûc yê kamî yo, sûcê mi çi yo?

Cewabê ci wicdananê ma pêrûne mîyan de yo.

Welato ke însanî çopan ra xo kenê mird de merdim se vajo, se biko, şêro kamca û kamî/e biko/a sûcdar?

Nêzana…