Serokatiya Rêveberiya Karesat û Rewşa Bilez (AFAD) a ser bi Wezareta Navxwe ya Tirkiyê eşkere kir ku di encama erdheja Îzmîrê  ya bi hêza 6,6ê de 24 kesan jiyana xwe ji dest dane û 804 kes jî birîndar bûne.

Li Îzmîrê xebatên lêgerîna kesên di bin kavilan de mane didome û xelkê Îzmîrê şeva borî di nav çadiran de û li derve şeva xwe derbas kirin.

Li gor amarên Wezreta Navxwe û AFADê ya Tirkiyê heta niha 24 kesan ji ber erdhejê jiyana xwe ji dest dane, herwiha 804 kes birîndar bûne ku 743 kes li Îzmîrê, 5 kes li Manîsayê, 2 kes li Balikesîrê û 54 kes li Aydinê bûne.

Herwiha li gor zanyariyan 341 paşlerzeyên din li wî bajarî çêbûne û xebatên lêgerînê yên ku li 17 avahiyan destpêkiribû, li 8 avahiyan bi dawî bûye û li 9 avahiyên din jî lêgerîn berdewam dike.

Herwiha ji tirsa paşlerzeyan û herifîna avahiyan şeva borî xelkê navçeya Erdhejê li derveyî malên xwe şeva xwe derbas kirin.

Serdozgeriya Komarî ya Îzmîrê jî derbarî erdhejê de û xirabiya mercên endazyariyê yên avahiyê de ku herifî ne, lêpirsîn daye destpêkirin.