Serokomarê Tirkiyê Recep Teyip Erdogan radigihîne, rêkeftina bi Amerîka re bo avakirina herêma ewle, tevgereke durist e û rê nadin ew rêkeftin bê derengxistin.

Kenala “CNN Turk” a Tirkiyê belav kir, Erdogan di dema vegera ji Rûsyayê bo welatê xwe ragihand, rêkeftina wan bi Amerîka re tevgereke rast e bo avakirina herêma ewle û divê şervanên YPGê ji wê navçeyê vekişin.

Erdogan Amerîka bi derengxistina bicihkirina wê rêkeftinê tometbar kir û got, Tirkiye rê nade rêkeftina herêma ewle bê derengxistin û wek çawa li Minbicê bûye bibe. Divê ew prose bilez bê kirin.

Di destpêka vê hefteyê de jî Erdogan ragihandibû, hemû hêz û leşkerên wan li ser sînor in û heger pêwîst kir ew dikarin di her demekê de tevgerê bikin.

Roja 7ê Tebaxê Amerîka û Tirkiyê li ser hejmarek ji xalan lihev kiribûn, li gor qonaxa yeke dê HSD û YPGê bi çekê xwe ji navçeya di navbera Serê Kaniyê û Girê Sipî bi kûrahiya 5 ta 14 K.M vekişe.

Hevserokê Nivîsgeha Berevaniyê ya Rêveberiya Xweser Zêdan El Asî pêr ragihandibû di daxuyaniyekê de ragihandibû, di çarçova qonaxa yekem a rêkeftina Amerîkî – Tirkî de wan dest bi cibicîkirina xalên wê rêkeftinê kirine.

Al Asî da zanîn, şervanên YPG û HSDê bi çekên xwe ji navçeyên sînorî yên Serê Kaniyê vekişayane û xalên sînorî ji bo hêzên navxweyî hatine radestkirin.

Herwiha hat ragihandin jî, HSD û YPGê tunelên xwe 3 gundên rojhilatê bajarokê Girê Sipî hilweşandin û şervan bi çekên xwe ji wê navçeyê vekişiyane.