Wexto ke sersefîranê 10 welatanê Ewropa waşt ke wa Osman Kavala bêro veradayîş, Erdoganî semedê sînorî ra teberkerdişê înan ferman da û tehdît kerd. Vera fermanê Erdoganî razînêbîyayîşî zêdîyenî.

Serekê Parlamentoyê Ewropa (PE) David Sassoliyî vera Erdoganî ranêzîbîyayîşê xo mojna û vat: ''Sînorî ra teberkerdişê 10 sersefîran mojneno ke hukmatê Tirkîya beno otorîter. Ma do mevisîyê. Osman Kavaliyî rê azadîye.

Fermanê Erdoganî medyaya Rojawanî de zaf veng da. Hêverî Swêd û Norweçî ranêzîbîyayîşê xo mojna. Selahîyetdaranê wird welatan zî pare kerd ke xebera înan pê çin a ke sersefîrê Tirkîya welatî ra şîyê. 

Dîrektorê  Hukmatê Norweçî yê Têkilîye ra Berpirsîyar Trude Maseideyî vat: ''Sersefîranê ma kerdişêko winasên heq nêkerd.''

Wezîrê Karanê Tenerî yê Almanya îfade kerd ke ê selahîyetdaranê 9 welatanê bînan de mîyanê têkilîye de yê.

Wezîrîya Karanê Teberî ya Danîmarka vat: ''Zanayîşêko winasên nêresa ma ke sersefîrê ma Tirkîya ra do bêro eştene. Ma do krîter û erjanê xo yê hemparan ser o hîsgerîya xo rê dewam bikerê.''

Parlamentera Hollanda û Raportora Verêne ya Tirkîya Kati Piri zî hesabê xo yê medyaya dîjîtale ser o paştî daye 10 sersefîran. Pari eşkera kerd ke ganî Anqara biranê Mehkemeya Heqanê Merdiman a Ewropa bîyara ca û Yewîya Ewropa zî paştî bida nê sersefîran.

Rojnameyê namdarî yê Almanya Bildî kerd manşet ke Erdoganî senî sersefîrî kerdî hedef. Bildî xebera xo de vat: ''Ma zaf halanê Erdoganî musayî. O tim tewrê xo yê otorîter û tedakerî dibare keno. Zanîyeno ke Erdogan eleqe nêmojneno heqanê merdiman, şino serê muxalîfan û rexnegîran. Heqê cinîyan û serdestîya huqûqî ci rê girîng nîyê.''