Eşkera bi ke Dêrsim de menga çeleyî de 8 pezkovîyî ke merde ameyî dîyene, bakterîya Sphingomonas Paucimobilisî ra telef bîyê. Cigêrîyeno ke 7 pezkovîyê bînî bakterî ra telef bîyî yan nê.

Dewa Çanakçi ya qezaya Mazgêrdî ya Dêrsimî de 8 pezkovîyî merdbî. Numuneyê pezkovîyan Xarpêt de laboratuwar de ameyî cigêrayene. Cigêrayîş de eşkera bi ke pezkovîyî bakterîya bi nameyê Sphingomonas Paucimobilisî ra semed merdî. Goreyê tesbîtan na bakterî gandaran de beno sebebê mergî.

Hewteyê vîyarteyî de zî reyna 7 pezkovîyî bi hawayêkê komkî merdî. Nê pezkovîyan ra zî numûneyî erşawîyayî laboratuwar. Cigêrîyeno ke 7 pezkovîyê bînî bakterî ra telef bîyî yan nê.

Zanîngehê Firatî ra Prof. Dr. Hakan Kalenderî zî pare kerd ke na bakterî Erzirom de dîyabî. Kalenderî ard ziwan ke bakterî awe, erd û hewa de xo mojnena. La bakterî bi rehetî enfekte bena. Bakterî nefesgirewtişê heywanan yanî cigêran rê tesîr kena û tede mîkroban virazena. La bakterî sey jan vila nêbena.''