Dogan Çetîno ke Edîrne de eskerîya mecbûrî keno seba ke vat ''Werrekna ma perwerdeyê kurdkî bigirewtêne'' rastê îkenceyê eskeran ame. Doganî gere kerd la  vano, asayîşê ganê mi çin o.

Hedîse 15ê tebaxe de qewimîya. Çetînî seba ke kurdkî qisey kerdêne û kurdkî pawitêne bi hedefê hêrişan. Hêrişî ra dima bedenê Çetînî de xeylêk rêçê îşkence virazîyayî. Çetîn wedarîya nêweşxane û 3 rojî tedawî dî. Çetîn dima ke taburcu bi agêra Mêrdîn û  gerreyê eskeran kerd.

Çetînî Ajansê Mezopotamya rê wina qala hêrişî kerd: 'Mi vat werrekna ma kurdkî perwerde bigirewtêne. Awirê leşkeran vurîyayî.  Dimara  înan  reyna venga mi da û ez berda kişta laye. Uca de mi rê va 'ti do hesabê şehîdan bidî' û pê çeke daye rîyê mi ro. Pirnika ma şikîya. Wexto ke ez ginaya erdî ro înan reyna ez derb kerda. No hêriş plankerde yo. Na nîjadperestî ya.''