Vêşnayîşê sinemaya bajarê Amûdê ya Rojavayê Kurdistanî ser ra 60 serrî vîyartî.

60 serrî verê cû  serra 1960î de 283 tutê kurdî ke şîbî sînemaya Amûdê, mîyanê kilanê adirî de merdî.

Heta nika sebebê ê şewatî nêameyo aşkerekerdiş, labelê heme nîşanî aşkere kenê ke şewat komkiştişêko plankerdî bi.

Di roja 13.11.1960an de semedê hetkarîya Şorişê Cezayirî, Rojavayê Kurdistanî de bi qerarê Rejîmê Baasî şaristanê Amûdê  de, heme wendekarê dibistanê seretayî rê bi mecbûrî sinema de fîlmê ”Cerîmet Nisif el Leyl”dîyeno temaşe kerdene. Salona ke semedê 200 kesan a de qasê 500 domanê Kurdan erzîyenê zereyê ci.

Wexto ke pêro domanî kewenê zereyê sînema, eskerê Sûrîye berê ci qefinenê û zerde de adir vejyen. Wexto ke domanî vînenê ke şewat vejyayo pêro-pîya verê xo danê berê tebervejyayîşî ser. La çi heyf ke ber teber ra amebi qefilnayene.

Hedîse ra dima derheqê hedîse de tehqîqatêk nêame akerdiş û semedê qûrbanîyanê şewatî, tazîye amey qedexe kerdene.

Heta şerê zereyî yê serra 2011 zî rejîmê Sûriye nêverda wa semedê qûrbanîyan yadkerdişêk yan zî aktîvîteyêk bêra viraştene.

Komkiştişê Sînemaya Amûdê, demê awankerdişê Komara Yewitîya Erebî ya mabênê Sûriyê û Misrî de bibi.

O wext zî sey ewroyî Kurdan rê dişmenetîya pîle bîyêne.

Vêşnayîşê sinema ra ver qasê 3 aşman, 5 hezar kurdî rîyê xebatanê xo yê polîtîkî ra ameybî tepiştene.

Mihemedê Seîd Axayê Deqorî demê şewatê sinema de xelaskerê zaf tutan bi. Şewa Şewatê Sînemaya Amûdê de, bi desan tutan sinema ra vejeno û xelisneno. Peynî de binê stûnêk de mend û dinyaya xo bedilna.