Heval, dost û weltperwerê ercîyayê!

Heme dost û hevalê ke mîyanê Îtîfaqê Welatperwer û Demokrat de ca girewtê wa rind bizanê ke, emego ke înan seba Weçînayîşê 31ê Adara 2019î dayo şîyo sere û ma pêro nika ra bîyê serkewtê.

Heme hevalê ma bi zerrî û bi fedakarîya pîle  xebata weçînayîşî kenê. Ma pêro rind zanenê ke hevalê ma yê cinî zî bi performansêko weş xebitîyenê. No zî heyecan û hêvîya ma kena zêde. 
Rasta zî nika ra heyecan, germîye û şewqêk esto zerrîya ma pêrune de. Ma xeylê serran ra dima reya ewilî bi no qayde vejîyayê sehne, meydan û mîyanê şarê xo. 

Ma bi na xebata xo ya weçînayîşî tersêka pîle şikite. Şarê ma sey şaro verên nîyo ke rayîr bido hêrîşanê tayn hetan. Weçînayîşê mehelî rê 6 rojî mendê. Lazim o ma nê 6 rojanê xo bi efektîf û weş bixebitne.Lazim o ma nê rojan de giranîya xo bidim zîyaretkerdişê nas, dost, merdim û cîrananê xo. Gere ma giranîya xo bidim şexsîyet û cayê ke potansîyelê xo estê û beno ke nê kesî destegê xo bidê ma. 

Hevalê ercîyayê! Ma mîyanê nê 6 rojan de çiqas rayanê xo zêde bikê, seba meşte-bîro hêvîya ma hende zêde bena. Her ray yena manaya şikîyayîşê terse û yewrengîye.
Helbet ma xeyalperest nîyê. Eke ma netîceyêko weş bigîre do rîpelêko newe abibo. O semed ra mi sere de zî va, ma nika ra serkewtê. Ma bi Îtîfaqê Welatperwer û Demokrat û bi nê xebatanê xo, hem kulturê xo, hem demokrasî, hem azadîya mîyanê xo hem zafvengî hem zî zafrengî nîşan daya û heme kesan rê daya qebûlkerdene. Gere ma qîmetê xebata xo weş bizane. Beno ke zaf kêmasî û xeletîyê ma bîyê. La ma qet xo vîrî ra mekê ke ma ewro zî siba zî bi pîyatî bihêz ê. 
Ez venga heme heval, waye û birayanê xo ê rayver, endam û kedkarê PAK û PSK, heme kedkaranê Îtîfaqê Welatperwer  û Demokrat  dana ke wa nê 6 rojanê peyênan de hetê ekonomî û xebatanê bînan ra, hetê xebata propaganda û wayîrvejyayîşê yewbînî ra çi destê înan ra yeno wa bikerê.

Ez şima pêrune rê bi hîsanê hevaltî,  biratî û welatperwerî silam kena.