7 dezgehanê komelkî, kulturel û hunerî pare kerd ke ê do serra 2022î de Amed de Festîvala Feqîyê Teyran bikerê.

Odaya Bazirganîye û Sanayî ya Amedî (DTO), Weqfa Hetkarîya Merdimîye û Koçberîye, Wêphotos, Merkezê Hunerî yê Mordemî, Atolya A4î, Wêjegeh Amed û Kolektîfê Hunerî yê Merkezî bînaya Mordemî ya Peyasî de eşkerayîyêka çapemenîye reyde da zanayane ke ê do nîsana 2022î de  Amed de Festîvala Mîyanneteweyî ya Feqîyê Teyran a Kultur, Huner û Xoza serûber bikerê.Eşkerayîye de Berpirsîyarê Wêjegehê Amedî nuştox Lal Laleş û Serekê DTOyî Mehmet Kayayî qisey kerd.

Lal Laleşî ard ziwan ke 30 dezgehî do paştî bidê festîvale û vat: ''Feqîyê Teyran erdê Mezopotamya de bi namdar. Amed do vengê ci biresno pêro dinya.''

Mehmet Kayayî zî îfade kerd ke ganî her kes  paştî bido festîvale û paştgîran ra sipas kerd.

Dima derheqê Feqîyê Teyran de sînevîzyonêk ame mojnayene û orkestraya Mordemî tay deyîrî vatî.