Festîvala Fîlmên Kurdî ya Parîsê (FFKP) ku wê di navbera 3 û 6ê Tîrmehê de, li Navenda Wallonie-Bruxelles ya li Parîsa çaran pêk bê, dê hijdeh (18) filme û dokumanterên kurdî yên qedexekirî nîșan bide. Fîlmên ku wê bên nîșan dan, temsîla takefilm û koleksiyonên derhênerên Kurdistanê dikin. 
Festîval ji aliyê Enstîtuya kurdî ya Parîsê û CinéBej, komeleya sînemaya fransî-kurdî ve bi piștgiriya alîkarên wan Rebelles Films, les Ecrans de la Paix, festîvala navdewletî ya fîlmên kurtmetraj a Clermont-Ferrandê, Şaredariya Parîsa çaran û Navenda Wallonie-Bruxellesê pêk tê. 
Di vê festîvalê de yek ji 18 film û dokumanterên ku dê bên nîșandan yek jî “Gulîstan, Welatê gulan” e, ku ji aliyê Zeynê Akyol ve hatiye çêkirin. Ev belgefîlme meriv dibe nav refên yekîneyeke jinên kurd li bașûrê Kurdistanê ku hîn Daiș lê neqediyabû û van jinan bi dilêrî têkoșîna xwe ya li dijî barbariya wan didomand.