Festîvala Kultur û Xoza ya Mûnzûrî ya 19’ine ya ke emser bi şîarê ‘’Dêrsimî rê, bawerî, ziwan û kulturê xo rê wayîr vejî, biciwîye û bide ciwînayene!'' yena viraştene, vizêr dest pêkerde  û do heta 28’ê menge dewam bikero.

Festîvala Kultur û Xoza ya Mûnzûrî ya ke do heta 28'ê Temmuze dewam bikero vizêr bi zîyaretê Gola Cetû û dûayan amey dest pêkerdene.

Destanê Xo Bimbarekanê Ma Ser Ra Biancenê

Çarçeweya festîvale de Meydanê Seyîd Rizayî de beyanatêk ame dayîş. Pîr Zeynel Kete beyanat da û va ’’Ewro îtîqat  û kulturê Elewîyan çîn hesibyenê. Goreyê îtîqatê ma her çî ganî goreyê waştişî bibo. La ewro bê waştişê ma  bimbarekanê ma ser o projeyan virazenê. Kulturê ma yeno qetilkerdene.  Bê desturê ma çew nêeşkeno çîyêk bikero. Destanê xo bimbarekanê ma ser ra biancenê.’’

Mûnzûr Do Kizil Meherikîyo, Dêrsim Do Kizil Bimano

Festîvale bi panelê ekolojî dewam kerde. Panelo ke kuçeyê  Sanatî de ame viraştene de seba vîrardişê Nûpelda û Ayazî rêz ame girewtene. Panel de muhîmîya kultur û xoza de ame qiseykerdene û ame vatene ke bi sebebo ke coğrafyaya Dêrsimî zengîn o bi projeyan wazenê ke ma bêçare bikerê. Sereyê heme ganîyan bela de yo. Ganî ma bi xurtkerdişê mucadeleyî vernîya naye bigerê.   

Dêrsim Sey Vizêr Do Siba Zî Dêrsim Bo

Roja verêne ya festîvale bi konseran dewam kerde. Qiseykerdişê akerdişî  Serekê Peroyî yê Heyetê Pawitişê Mûnzûrî (DEDEF) Alî Haydar  Benî kerd. 

Benî  veng da selahîyetdaran ke wa nameyê Dêrsimî îade bikerê û va, nameyê Dêrsimî sey vizêr siba zî do Dêrsim bo.  Dima ra konserê bi Koroyê Domanan ê Behzat Fîrîkî dest pêkerd. Koroyî deyîrê xo semedê waye û birayî Ayaz û Nûpelda yê ke Pulur de teqayîşêk ver merdbî va. 

Badê cû zî Erdogan Emîr, Babetna, Mîkaîl Aslan û Grûbe Vardîya vejîyayî sehne.