Kolektîfê Sînemaye ra Harûn polatî va, “Sansûran ver xeylê fîlmê Kurdan nêrasenê temaşekerdoxan. Fîlmî Kurdan mela festîvalan de bêrê temaşekerdiş.

Festîvalê Fîlmanê Kurdan reya verêne 2019î de virazîya. Festîval dima pandemîyî ver mabeyn da û emser reyna virazîyeno. Festîval do 24ê Adare de Merkezê Kulturê Bajarî yê Cemîl Candaşî yê Şîşlîyî de dest pêbikero. Feestîvalê Fîlman ê Kurdan hetê Kolektîfê Sînemaye yê Merkezê Kulturî yê Mezopotamyayî ra organîze beno. Muhîmîya pîle ya festîvalî na ya ke, temaşekerdoxî eşkenê fîlmanê sansûrkerdeyan nê festîvalî de temaşe bikerê. Festîval bi fîlmê ‘Kurdê Êzidîyî’ dest pêkeno. No fîlm hetê Amasî Martîrosyanî ra 1933yî de ameyo antene. Bernameyê festîvalî de konserî do bêrê dayene û derheqê sînemaya Kurdkî de do forûmêk bivirazîyo.

‘Sînemaya Kurdkî aver de şina’

Kolektîfê Sînemaye ra Harûn Polatî derheqê festîvalî de qisey kerd û va, “Sînemaya Kurdkî, bi waştişanê azadîye xeylê fîlmî vetê meydan. Çar leteyê Kurdistanî û dîasporayî de xeylê fîlmê Kurdan yenê antene. Bi zêdebîyayîşê fîlman festîvalî zî zêdîyenê û bi no qeyde sînemaya Kurdkî aver de şina.

Verê averşîyayîşî de ma raştê probleman zî yenê. La ma cehd kenê ke fîlmanê Kurdan birasnê temaşekerdoxan.”

24ê Adare saete 19.00î de Merkezê Kulturî yê Cemal Candaşî de do festîval bi kokteyl, konser û bi mojnayîşê fîlman dest pêbikero. Fîlmî do 25-26-27-28ê Adare de do Eywana Sînemaye ya Cine Majestikî ya Beyoglûyî de bêrê mojnayene. Qedînayîş zî do 29ê Adare de reyna Merkezê kulturî yê Cemal Candaşî de bibo. Şima eşkenê bernameyê festîvalî hesabanê Kolektîfê Sînameye ra teqîb bikerê.