Serrgêra mergê ci de Firîk Dede hetê Komeleya Elewîyan a Demokratîke ra ame yadkerdiş.

Firîk Dede pîranê Ocaxa Derwêş Cemalî ra bi. Serrgêra mergê ci de hetê Şûbeya Enqarayî ya Komeleya Elewîyan a Demokratîke ra ame yadkerdene. Hetê komaleye ra malûmatêk ame weşanayîş. Firîk Dede 10ê Temûze 2007î de şibi heqîya xo.

‘Dejê ci zî nêniştê hêsirê ci zî’

Temamê malûmatî wina yo:

“Firîk Dede Pilûre de cuwîyayêne. Derheqê tradîsyonê fekkîyî de temsîlkaranê peyênan ra bi. Firîk Dede pîranê Dewrêş Cemalî ra bi û 2007î de 106 serrîya xo de şi heqîya xo.

Wextê darbeya 80yî de lajê ey verê çimanê kekê xo de bêstîyabi darêk û hetê Yuzbaşîyo Qulaxsizî ra gande-gande amebi vêşnayene. Nameyê lajê ey Behzad bi. A roje ra dima Firîk Dede sîya best û reyna hêrdişa xo nêqesna, qisey nêkerd û hêsirê ci nêniştê.

‘Bizane ke lawo pêro tarîyî xirab ê’

“Pêro zîyar û dîyarî ma ra hêrs bîyê..

Meperse çi ameyo ma ser lawo, wextêko tarî bi. Ma ke sifreyanê heramîyan ser de da pêro, ma binkewtê. Bizane ke lawo pêro tarîyî xirab ê. Coka pêro emrê xo de mi sodirî rê secde kerdo. Çimkî sodir xeberdarê roştîye yo. Roştîye pîr û pak a. 

“Ma tilsimê Dêrsimî xeripna lawo”

Xo vîrî ra mekere ke pêro Daranê pîlanê Dêrsimî ma rê verare kerdibî ya û koyê ma şikefta mazlûman bî. La ma rêça xo ra vejîyayê. Ma sifreyê zaliman de piranê goninî werdê. La înan nîya nêkerdibi, wayîrê rêça xo vejîyaybî. Ma tilsimê Dêrsimî xeripna lawo û ma hesabêko giran da. Ti nika fam kenî ez çira hêrs bîya lawo?”

Ma kamilanê xo bi zerrîyane, bi hurmet û eşqî yad kenê.

PÎRHA