Li gor nûçeya Rudawê Endamê Serkirdatiya Yekîtiya Niştimaniya Kurdistanê (YNK), Xalid Şuwanî di daxuyaniyekê de ragihand: "Eniya Tirkmenî li Kerkûkê navê nêzîkî 600 endamên xwe tomar kiriye û bi alîkariya Tirkiyê ew kes çekdar kirine."

 

Xalid Şuwanî herwiha got: "Me li ser çekdarkirina wan endamên Eniya Tirkmenî belge li ber dest hene."

 

Şuwanî herwiha da xuyakirin, ku wan hikûmet û dezgehên istixbaratî yên Iraqê ji çekdarkirina endamên Eniya Tirkmenî bi alîkariya Tirkiyê, agahdar kirine.

 

Şuwanî, di berdewamiya axaftina xwe de got: "Li Tirkiyê rahênan bi wan çekdarên Eniya Tirkmenî hatiye kirin, piştre hatine çekdarkirin û ji aliyê Tirkiyê ve di navbera 400 heta 700 dolarî jî mûçe ji wan re hatiye dabînkirin."

 

Xalid Şuwanî destnîşan kir, di dema rahênanê de, berpirsên Eniya Tirkmenî serdana wan endamên xwe yên çekdar li Tirkiyê kirine û niha jî bi navê zêrevanên baregehan, ew çekdar li ser baregehên Eniya Tirkmenî li Kerkûkê hatine dabeşkirin.