Garîbe Gezera ke vat bi Zîndanê Kandira de îşkence vînena, dinyaya xo bedilnaye. Îdareyê zîndanî îdîa kerd ke aye xo kişto. Waya Gezer Asya Gezer vat: ''Miheqeq îdareyê zîndanî çîyêk kerdo.''

Garîbe Gezera ke  Zîndanê Kandira de binê zext û îşkenceyî de ameyêne tepiştene dinyaya xo bedilnaye. Îdareyê zîndanê ke xebere daye keyeyê ci û îdîa kerd ke aye xo kişto la merdimê Gezere vanê kênaya înan xo nêkişt, beno ke ameye kiştene.

Avûkate Eren Kesîn hesabê xo yê twîtterî ra da pêhesnayene ke înan rê xebera xokiştişî ya Garîbe Gezere ameya. Keskîne vist vîrî ke Gezere mexdurê îşkenceyî bî û cezaya ci ya hucreyî estbî û vat Gezere dinyaya xo bedilnaye.

Waya Garîbe Gezer Asya Gezere îdareyê zîndanî nîşan da û vat miheqeq înan çîyêk kerd. Asya Gezer ard ziwan ke aye tewr peynî de 16ê teşrîna peyêne de waya xo de qisey kerd û vat: ''Rewşe ci hole bî û moralê ci ca de bi. Mi ra vat 'zetxtê vera ci biney kêmîyayî coka rewşa ci hol a.' Mi aye rê vat 'ez do menga çeleyî dî şirê zîyaretê ci.'' Zaf keyf kerd û vat çimê ci rayîr de yê.' Ewro mudirê diyînî yê zîndnaî gêra mi û vat 'waya to xo kişto.' Mi vat ez naye ra bawer nêkena û do gerreyê înan bikerî. Ez nika Mêrdînî ra şina Kandira. Waya mi xo nêkişt, miheqeq înan çîyêk kerdo.''

Gezere bi rayîrê mektuban û avûkatanê xo dabi zanayene ke a hucre de têna yena tepişne, raştê îşkenceyê sîstematîkî yena û raştê tecawuzê gardîyanan ê cinîyan ameya.