Girtiyê Kurd ê bi navê Nevzat Çelîk ku li Girtîgeha Tîpa T a Bafra ya Samsûnê ya Tirkiyê girtî bû, piştî 30 salan hat berdan.

Girtiyê Kurd Nevzat Çelîk piştî 30 salan, di 1ê Kanûnê de ji Girtîgeha Tîpa T a Bafra ya Samsûnê hat berdan.

Hateragihandin ku Çelîk di sala 1992an de li Ameda Bakurê Kurdistanê hatiye desteserkirin.

Piştre ji aliyê Dadgeha Ewlehiyê ya Dewletê (DGM) ve bi hinceta “endamtiya rêxistinê” û “Xerakirina yekitiya dewletê û yekparçeyiya welat” 36 sal cezayê zindanê lê hatibû birrîn.

Li gorî nûçeya Ajansa Mezopotamyayê, Çelîkê ku hat berdan, duh bi şev bi balafirê çû Firokexaneya Amedê.

Çelîk li firokexaneyê ji aliyê malbatê, rêveberên Komeleya Piştevaniya bi Malbatên Girtiyan (TUAY DER) a Amedê, endamên Rêxistina Partiya Demokratîk a Gelan (HDP) ya Amedê û gelek welatiyan ve hat pêşwazîkirin.