Gola Wanî de wextê asnawe yo. Germbîyayîşê hewayî reyde şarî verê xo da Gola Wanî.

Gola Wanî ya ke girdêra gola soda ya dinya ya, germbîyayîşê hewayî reyde merdimî kewenê mîyanê awa ci û tede benê  rehet.
Bi taybetî qezayanê Artemêtan, Westan, Erdîşî yê Wanî ra û Tetwan û Adilcewazî yê Bedlîsî ra merdimî yenê kewenê awa Gola Wanî.  Gola Wanî ya ke hîna wayîrê qeraxanê pakan a, bi taybetî domanî kewenê awe. Der û dorê Gola Wanî ya ke eserêka bêhempar a xeylî awanîyî tarîxkî estê.

Gola Wanî de û der û dorê ci de bi seyan tewirê mîlçikan estê. Hetê bînî ra maseyêkê ci yê xoserî estê ke dinya de teyna Gola Wanî de nê maseyî estê. Semedê rîndekîya ci ya xozayî û awanîyê tarîxkî yê girawanê ci Gola Wanî bale ancena û her serre bi hezaran turîstê cayîyî û xeribî yenê serdana Gola Wanî. Leyê na rîndekîya ci de, seba ke awa ci bisoda ya, yeno vatene ke dermanê xeylî nêweşîyan a. Bi destpêkerdişê hamnanî Amed, Agirî, Îdir, Colemêrg, Mûş, Şirnex û xeylî bajaranê bînan ra bi hezaran merdimî seba asnawekerdişî yenê Gola Wanî. Gola Wanî de merdimî bi garanî mabênê menganê Hezîrane û Êlule de asnawe kenê. Dimayê menga Êlule awa gole bena serdine.