Navenda Nûçeyan- Senatorê Komarî Lindsey Graham bersiva daxuyanîyên serkirdeyên Supaya Pasdaran, General Hisên Selamî da.

Lindsey Graham li ser twîterê belav kirîye, berovajî axaftinên serkirdeyê Supaya Pasdaran a Îranê Hisên Selamî, mezintirîn gefa li ser gelê Îranê ne hikûmeta Amerîka yan jî gelê Amerîka ye, lê murîdên Ayetullah ên weke Selamî ne.

Graham dibêje, wan welat dizîne û samanên gelê Îranê ji bo dirustkirina tevlîhevîyê û nearamîyê li hemû navçe û cîhanê bi kar tînin. Graham tekez dike: Ji bo min teqez e ku rojên wan kêm mane.

Senatorê Amerîkî herwiha Trump han dide ku cezayên zêdetir li ser Îranê bisepîne.

Graham ji Trump re gotîye: “Di dawîyê de hûn dê xizmeteke mezin a gelê Îranê bikin û dema ku ew rejîma qatil hilweşe, hûn dê cîhanê bikin cihekî baştir.”

Fermandarê Supaya Pasdaran a Îranê, Hisên Selamî pêr di daxuyanîyekê de, Amerîka, Brîtanya, Erebistana Siûdî, Îsraîl û herwiha alîyên dijberê Komara Îslamî bi wê yekê tohmetbar kiribû, ku destê wan li piştî xwepêşandanên wê dawîyê yên li Îranê hebûye û gef li wan xwaribû, ku eger ew alî xetên sor ên Îranê derbas bikin, ew dê wan ji holê rakin.

General Selamî gotibû: “We ji me zileyeke qahîm xwarîye û we nekarîye bersivê bidin, ku cîhanê hin ew zile dîtine û hin jî nedîtine. Eger hûn xetên me yên sor derbas bikin, em dê we ji nav bibin.”

 Çavkanî: Rûdaw