Merkezê Xeberan- Rojnameyê Îngîlîstanî Guardian îdîa keno ke, 2 hezar Surîyeyijî seba ke şêrê Lîbya û uca de şer bikerê, Sûrîye ra neqlê Tirkîya bîyê.

Rojnameyê Guardianî xebera xo de wina nuşt: Nê çekdarî do seba Fayez el Sarrajî Lîbya de do şer bikerê.  Hukmatê Sarrajî Rojhilatê Libya de artêşa Xalife Hafterî dir şer keno û hukmatê Serrajî Tirkîya ra ardim waştbi.

Tirkîya verê cû zî qasê 30 çekdarê Surîyeyijî erşawitbî Lîba û înan ra 17 hebî şer de ameybî kiştiş.

Gorê îdîaya Rojnameyî Tirkîya Surîye de 450-550 TL maaş dana çekdaran û nê çekdarî Lîbya de do 2 hezar dolar (11 bin 800 TL) maaş bigîrê.

Heto bîn ra îdîa beno ke, Tirkîya do heqê hemwelatîye bido çekdaranê Surîyeyijan.

Çekdarê ke Sûrîye de seba Tirkîya şer kenî, heta nika û nika vera Kurdan zî şer kenî.