HAK-PAR, PSK û PWKyî Dîyarbekir de Pîya Roja Alaya Kurdîstanî Pîroz Kerd

Partîya Heq û Azadîyan (HAK-PAR), Partîya Sosyalîst a Kurdîstanî (PSK) û Partîya Welatparêzanê Kurdîstanî (PWK), 17ê Kanûna Verêne ya 2024î de, Dîyarbekir de, salona Cemîyeta Rojnamegeranê Başûrrojhilatî de pîya Roja Alaya Kurdîstanî pîroz kerd.

Destpêkê pîrozkerdişî de, Serekê Teşkîlatê Amedî yê HAK-PARî Mistefa Okumuşî derheqê amancê na çalakîye de yew qiseykerdiş kerd û seba şehîdanê Kurdîstanî rêz ame girewtiş.

Badê hurmetnayîşê şehîdan, endamê Komîteya Îdareyî ya Merkezî ya PWKyî Yûsûf Aydinî bi kurdkî, beyanatê muşterekî yê HAK-PAR, PSK û PWKyî yê derheqê Roja Alaya Kurdîstanî de wend.

Dima cigêrayox û nuştoxê kurd Seîd Verojî derheqê tarîx, mana û muhîmîya Alaya Kurdîstanî de yew semîner da.

Zaf sîyasetmedar û roşinvîrê kurdan û endamê HAK-PAR, PSK û PWKyî beşdarê na çalakîye bîyî. Sîyasetmedar û roşinvîrê kurd Îbrahîm Guçluyî zî na çalakîye ra pîrozkerdişê her hirê partîyan kerd û derheqê Rojê Alaya Kurdîstanî de fikir û bawerîyê xo ardî ziwan.

Çalakîya muştereke ya HAK-PAR, PSK û PWKyî ya seba Roja Alaya Kurdîstanî atmosferêka weş de vîyart.

Buroyê Çapemenî yê Partîya Welatparêzanê Kurdîstanî (PWK)

HAK-PAR, PSK û PWK:

Rojê Alaya Kurdîstanî, Wa Bibo Destpêkê Hemxebate, Hemkarî û Yewbîyayîşê Neteweyî, Demokratîkî

17ê Kanûna Verêne Rojê Alaya Kurdîstanî ya.

Alaya Kurdîstanî ya ke ewro kurdê dinya sey alaya xo ya neteweyî qebul kenê, serra 1920î de, hetê Teşkîlatê Îçtîmaîye yê Kurdan ra bi yew qerarî ameya qebulkerdiş.

Alaya Kurdîstanî 100 serrî ra zêde yo ke sey yew erjê neteweyî ameya qebulkerdiş.

Alaya Kurdîstanî tena sembola azadîya Kurdîstanî nîya. Alaya Rengine, 100 serrî ra zêde yo ke rayîrşîyayîş û têkoşîna azadîya Kurdîstanî de rayberîya miletê kurdî kena, felaket û zehmetîyanê girdan de rayîrê ma roşn kena, hêvîyê ma ser lingane vindarnena.

A Alaya rengine ya ke 1920î de ameybî qebulkerdiş, hetê Xoybûnî ra serra 1930î de Koyê Agirî de berz bîye.

Alaya Kurdîstanî serra 1932î de ver û peyê Hawarî de, hûmara 11. (10ê Teşrîna Peyêne 1932) bi rengine ameya çapkerdiş.

Alaya Rengine Koyê Agirî ra resaye Rojhelatê Kurdîstanî. Yew grûba ciwananê kurdan 17ê Kanûna Verêne ya 1945î de, Alaya Rengine Mehabad de bînaya dadgeh de darde we.

Badê îlankerdişê Dewleta Komara Kurdîstanî, Hukmatê Komara Kurdîstanî Alaya Kurdîstanî sey alaya Komara Kurdîstanî (Komara Mehabadî) qebul kerde.

Alaya Rengine, Mehabad de, Komara Kurdîstanî de, hem bîye şahidê serkewtiş û mizgînîya azadîye, hem zî bîye sitare yewin Komara Kurdîstanî ser.

Alaya ke Serokomarê Komara Kurdîstanî Pêşewa Qazî Mihemed sey emanetê milî teslîmê Mela Mistefa Barzanîyê nemirî kerda, ewro bi şanazî Başûrê Kurdîstanî de Parlementoya Herêma Federe ya Kurdîstanî ser de berz bena.

Parlementoya Herêma Federe ya Kurdîstanî, sey qedirgirewtişî, ronişteya xo ya 11.11.1999î de, roja 17ê Kanûna Verêne, roja ke Alaya Rengine serra 1945î de Dadgeha Mehabadî de dardeyabî, sey Rojê Alaya Kurdîstanî qebul kerde.

Ma weş zanê ke her milet bi welat û nasnameyê xo esto; bi ziwan, kultur, tarîx, erj û remzê xo yê neteweyî keyeyê miletan de cayê xo gênê. Çîyo ke miletan sewîyeya tewr berze de temsîl keno bêguman alaya înan a.

Alaya Rengine esera têkoşîna seyan serra doza azadîye ya, nîşaneya ked û gonîya bi seyan hezaran heskerdoxanê azadîye ya. Alaya Rengine destê têkoşeranê azadîya Kurdîstanî de tim berz bîya.

Alaya Kurdîstanî rûmetê ma ya, remza ma ya neteweyî, bixobawerî û têkoşînî ya.

Ma ê kesê ke nêverdê Alaya Rengine bêro war, tim bi serkewtiş Alaya Kurdîstanî berz kerda, zerrî ra û bi hurmet anê xo vîrî.

Belê, na roje, roja ke bi hîsanê neteweyî, welatî wayîrvejîyayîş û berzkerdiş a Alaya Kurdîstanî ya.

Ganî na alaya, seba hemê Kurdîstanîyanê dinya sey Alaya Kurdîstanî ya neteweyî, welatî, muşterekî bêro qebulkerdiş.

Ma hêvî kenê ke Rojê Alaya Kurdîstanî, her çar parçeyanê Kurdîstanî de zî, bibo destpêkê hemxebate, hemkarî û yewbîyayîşê neteweyî, demokratîkî, welatî; bibo destpêkê azadîya her çar parçeyanê Kurdîstanî.

Ma hêvî kenê ke Rojê Alaya Kurdîstanî mîyanê hêzanê her çar parçeyanê Kurdîstanî de wa hişmendîya neteweyî, demokratîkî, welatî ser o, bibo destpêkê viraştişê yew tor û mekanîzmaya ke bieşko koordinasyon, hemahengî, dîyalog, girewtişdayîş, şêwra zereyin, pîya dîyarkerdişê fikir û helwestanê muşterekan pêrune.

Rojê Alaya Kurdîstanî hemê kurd û kurdîstanîyanê dinya rê pîroz bo.

17.12.2024

Partîya Heq û Azadîyan (HAK-PAR)

Partîya Sosyalîst a Kurdîstanî (PSK)

Partîya Welatparêzanê Kurdîstanî (PWK)