Partîya Heq û Azadîyan (HAK-PAR), Partîya Welatparêzanê Kurdistanî (PWK), Partîya Sosyalîst a Kurdistanî (PSK), şewa 20ê adara 2024î Amed de bi rayşîyayîşêkê bi meşxaleyan pîya newroze pîroz kerdê

Rayber û endamê HAK-PAR, PWK, PSKyî, Kuçeyê Hunerî yê Amedî de kom bîy. Bi pankartê ‘’Newroz Pîroz be, Newroze Şima Pîroz Bo’’ û bi meşxaleyan, heta Mêmanxaneyê Şaredarîya Amedî rayra şîy.

Şarê Amedî eleqeyêko pîl nîşanê rayşîyayîşî da û beşdarê rayşîyayîşî bi. Rayşîyayîş bi sloganê ‘’Biciwîyo Kurdistan’’, ‘’Biciwîyo Newroz’’ û bi kilamanê newroze ser o , Kuçeyê Hunerî ra heta Mêmanxaneyê Şaredarîya Amedî dewam kerd.

Verê Mêmanxaneyê Şaredarîya Amedî, Hetkarê Serekê Pêroyî yê PWKyî Mehmet Can Azbay, derheqê mana û muhîmîya na çalakîye û ya newroze de qiseykerdişêko kilm kerd.

Badê cû zi Rayberîya PSKyî ra Serhat Amedî bi kurmancî, endamê Komîteya Rayberiye ya PWKyî Mehmet Alî Yilmaz bi kirdkî-zazakî, Serekê Teşkîlatê Amedî yê HAK-PARî Vasif Kahraman bi tirkî beyanatê hempîya yê PWK, PSK û HAK-PARî yê derheqê Newroze de wend.

Badê wendişê beyanatê hempîyayî ra dima çalakî peynî bî.

No zî beyanato hempîya yê HAK-PAR, PWK, PSKyî yo:

NEWROZE PÊRÛNA KURDISTANÎYAN RÊ PÎROZ BO!

Ewro Newroz a.

Newroze serrnewîyê heme şar û neteweyanê Aryanî yo. La semedê miletê Kurd û şaranê Kurdistanî roşanê Newroze wayîrê cayêkê taybetî yo.

Kurdî û heme şarê Kurdistanî Newroze hetêk ra sey roşanê serra newîye û ameyîşê wisarî pîroz kenê; hetêk ra zî sey roja serehewanayîşî, xoverrodayîşî û tekoşînê azadî û serehewanayîşê Kurdistanî pîroz kenê.

Helbet ke, pa heme felaket û qetlîam û zordestîyan zî, gere ma Newroze, bi armancê vera dagîrkerî û zordarî û sey sembolê xoverdayîşê neteweyî û azadîye pîroz bike. Ayra Newroze vera dagirkerî, înkar û asîmîlasyonê miletê Kurd bîyo roja berzkerdiş û bihêzkerdişê hişmendîya neteweyî û kurdistanî.

Pa hendê dej û birînanê ma yê her çar perçeyanê Kurdistanî zî, Adirê Newroze ke sembolê estbîyayîş, sereberzî, qirardarî, hêvî, xoverdayîş, sereweradayîş û azadiye yo; do Rojhelat, Başûr, Rojava û Bakurê Kurdistanî de berz bibo.

Bakurê Kurdistanî de pîrozkerdişê Newroze wayîrê cayêkê taybetî yo. Ayra qasê se serrîyo ke Bakurê Kurdistanî de pîrozkerdişê Newroze bi reng û muhtewaya xo û bi hawêko azad nêno pîroz kerdene û qedexe yo.

No proseso ke ziwanê kurdî rastê jenosîdê asîmîlasyonî ameyo de, gere ma bi taybetî Newroze bi kurdî pîroz bike; ma bike ke na roje semedê averberdiş û qiseykerdişê ziwanê kurdî biba îmkanêk. Onca gere na roje biba platformêk semedê destvistişê heqanê neteweyî, komelkî û kulturî. Cayê pîrozkerdişê Newroze ganî bibê cayê tekoşînê semedê destvistişanê waştişanê neteweyî û demokratîk û berzkerdişê têkoşînê heqê tayînkerdişê qederê miletê Kurd.

Miletê Kurd tenya bi yewitî, hemkarî û yewrêziya neteweyî do bieşko destvistişanê xo bipawo û semedê azadî û xoserîya Kurdistanî gaman bierzo.

Bakurê Kurdistanî de rewşa nikayîne wezîfeyanê taybetan dana vernîya ma. Ganî partî, rêxistin û hereketê Kurd û Kurdistanî ca de ser waştişanê acîl yê hembar û potansîyela en hîra a Kurdan bêrê têhet û semedê hemkarîyêka hîra a neteweyî, demokratîke gamanê muhîman bierzê. Bicaardişê nê wazîfeyanê neteweyî û tarîxî, do rayîrê çareserîya meseleya Kurd û Kurdistanî weşêr û do destê şarê ma xurtêr biko.

Ma hêvî kenê ke Newroza emserî, semedê yewitî, hemkarî û yewrêzîya neteweyî bibo destpêkêk. Ganî ma wayîrvejyayîş, pawitiş û averberdişê hişmendî û destvistişanê neteweyî, her perçeyêkê Kurdistanî de Newroze de hîna zaf veje vernî.

Biciwîyo sembolê xoverdayîş û tekoşînê azadî û serehewanayîşê Newroze!

Biciwîyo yewrêziya hêzê neteweyî û demokratîk yê Kurdistanî!

Biciwîyo Newroz! 20.03.2024

– Partîya Maf û Azadîyan (HAK-PAR)

– Partîya Welatparêzanê Kurdistanî (PWK)

– Partiya Sosyalîst a Kurdistanî (PSK)