Meclisên taxên Şêx Meqsûd û Eşrefiyê yên Helebê bi Hikûmeta Sûriyeyê re gihiştine rêkeftinê.

Li gorî xalên rêkeftinê hêzên çekdar dê tevî çekên xwe, derbasî navçeya rojhilatê Feratê bibin.

Xalên rêkeftina her du aliyan wiha ne:

1-Taxên Şêx Meqsûd û Eşrefiyê yên ku piraniya şêniyên wê Kurd in, ji taxên bajarê Helebê ne û di aliyê îdarî de girêdayî bajarê Helebê ne. Parastin û rêzigirtina ji taybetmendiya civakî û çandî ya şêniyên her du taxan ji bo xurtkirina jiyana hevbeş a aştiyane, mijareke girîng e.

2-Ev lihevkirina demkî dê heta lihevkirineke domdar a ji aliyê komîteyên hevbeş ve di pratîkê de be.

3-Wezareta Hundirîn û Hêzên Ewlekariya Hundirîn berpirsiyarên parastina şêniyên her du taxan in.

4-Ji bo ewlehî û aramiya şêniyên her du taxan, çek di nav taxan de tên qedexekirin û tenê di destê Hêzên Ewlekariya Hundirîn ên ku girêdayî Wezareta Hundirîn in de dimînin.

5-Heta ku rewşa her du taxan aram bibe, ax ji ser rêyên giştî tê rakirin û xalên kontrolê yên sereke di destê Hêzên Ewlekariya Hundirîn ên ku girêdayî Wezareta Hundirîn in de dimînin.

6-Hêzên leşkerî bi çekên xwe ji her du taxan ber bi herêma rojhilatê Firatê ve vedikişin.

7-Li taxa Eşrefiyê û li taxa Şêxmeqsûd 2 navendên Hêzên Ewlekariya Hundirîn tên vekirin.

8-Tevgera çûnûhatinê ya şêniyên herdu taxan bi serbestî ye. Nabe kesekî ku destê wî bi xwîna Sûriyeyiyan nebûye û berî lihevkirinê xwestî bû were girtin.

9-Ji bo hêsankirina tevgera çûnûhatinê di navbera bajarê Helebê û herêmên Bakur û Rojhilatê Sûriyeyê de, komîteyeke koordînasyonê tê avakirin.

10-Ji bo pêkanîna vê lihevkirinê komîte di her du taxan de tên avakirin.

11-Hemû saziyên sivîl ên her du taxan bi koordîneya bi saziyên sivîl ên din re dixebitin û bê ku cudahiyê bixin navbera taxên bajarê Helebê, alîkariyê didin saziyên din, ew jî bi rêya he rdu şaxên şaredariyê yên li Şêx Meqsûd û Eşrefiyê pêk tên.

12-Girtiyên her du aliyan tên berdan û hemû dîlên ku piştî rizgarkirinê hatine dîlgirtin, bi hev tên guhertin.

13-Nûnertiya her du taxan bi awayekî giştî û wekhev di Meclisa Parêzgeha Helebê de û di Odeya Bazirganiyê û hemû qadên din de, li gorî qanûnan tê kirin.

14-Saziyên xizmetguzarî, rêveberî, perwerdehî, şaredarî û meclisên xwecihî yên her du taxan, heta pêkanîna lihevkirineke domdar ji aliyê komîteyên hevbeş ve, wekî xwe dimînin.

Rêkeftin ji aliyê nûnerên Hikûmeta Şamê yên bi navên Mihemed Ebdulxenî, Mesûd Betal û Hevserokên Meclisên Taxên Şêx Meqsûd û Eşrefiyê Nûrî Şêxo, Hêvîn Silêman ve hatine îmzekirin.