Hereketa Azadî, PAK, PSK ji bo ku êrîşên li ser Alaya Kurdistanê û li ser teşkîlatên xwe yên Amedê bi şermezar bikin, roja 20.12.2022yê li Cemîyeta Rojnamevanan a Dîyarbekirê bi hildana Alaya Kurdistanê civîneke çapemenîyê li dar xistin.

Li ser navê Hereketa Azadî, PAK, PSK yê daxuyanîya hevbeş bi kurmancî Berdevkê PAKê Hanîfî Tûran, bi tirkî jî endama Komîteya Birevebir a Navendî ya PSKyê Selva Baksî xwend. Kurmancî, kirmanckî/zazakî û tirkîya daxuyanîyê li ragehandinê hate belav kirin.

Li gel rêvebir û endamên Hereketa Azadî, PAK, PSKyê, nûnerên TDK-TEVGER, HAK-PAR, DDKD, PDK-Bakur, KKP, Partîya Azadî, PIA, PDKT, DBP, HDPyê û gelek sîyasetmedar û rewşenbîrên Kurd jî ji bo piştgirîyê beşdarî civîna çapemenîyê bûn.

Piştî ku daxuyanîya hevbeş hate xwendin, sîyasetmedar û rewşenbîrê Kurd Îbrahîm Guçlu wek parêzer jî di derbarê êrîşên li ser Alaya Kurdistanê û girtina ser avahîyên hersê partî û hereketan da agahdarî da.

Nûnerên gelek partî, tevger û rêxistinan jî di civîna çapemenîyê da axaftin, êrîşa li dijî Alaya Kurdistanê û êrîşên li ser partî û rêxistinên kurdistanî şermezar kirin.

Gelek telewîzyon û dezgehên ragehandinê civîna çapemenîyê şopandin, weşanên zindî kirin.

Ev jî daxuyanîya hevbeş a Hereketa Azadî, PAK, PSKyê ye:

………………………………………………

Emê serê xwe li himberî tu êrîşan netewînin; Alaya Kurdistanê nirxa me ya neteweyî ye

Li ser daxwaza Serdozgerê Cimhûrîyetê yê Amedê û bi îzna Dadgeha Sulh û Cezayê ya Yekem a Amedê , polîsên Emnîyeta Amedê, roja 19.12.2022yê avêtin ser Teşkîlatên Amedê yên Hereketa Azadî, PAK û PSKyê.

Wekî tê zanîn bi minasebeta Roja Alaya Kurdistanê Hereketa Azadî, PAK û PSKyê li Teşkîlatên xwe yên Amedê Alaya Kurdistanê hilda bûn.Û wek nûçe di hinek malperan da wêneyên hildana Alaya Kurdistanê ya Hereketa Azadî, PAK û PSKyê hatibûn belav kirin.

Hinek kesên nîjadperest, di sosyal medyayê da van wêneyan kiribûn sebebê êrîşa li dijî Alaya Kurdistanê û Hereketa Azadî, PAK û PSKyê jî wek hedef nîşan dabûn.

Serdozgerê Cimhûrîyetê yê Amedê nîvîsên van nîjadperestan yên li ser sosyal medyayê wek şîkayet qebûl kirîye û bi îzna Dadgeha Sulh û Cezayê ya Yekem a Amedê îzna ligerînê wergirtîye.

Polîsên ku avêtine ser avahîyên Hereketa Azadî, PAK û PSKyê ew belgeya îznê nîşanî rêvebirên hersê partî û hereketan dane û dest bi lêgerîna nav avahîyên hersê partî û hereketan kirine û gotine ‘’Ji ber ku we Alaya Kurdistanê li ser tabelaya teşkîlata xwe hildaye, Serdozgerê Cimhûrîyetê yê Amedê îzna lêgerîna nav avahîyê daye me. Em ji bo vê sedemê hatine’’. Di dema lêgrînê da parêzeran partîyên me jî li avahîyên me amade bûn.

Herçiqas, sedema van lêgerînan wek Alaya Kurdistanê hatibe nîşandan jî, polîsan, li ser emrê serdozgerî, dest danîne ser hemû kompîtur, dokumanên fermî, dosya, pirtûk, kovar, afîş û alayên Kurdistanê û birine Emnîyeta Dîyarbekirê.

Polîsên Emnîyeta Amedê Cîhgirê Serokê Giştî yê PAKê Nûrûllah Tîmûr, Sekreterê Giştî yê Hereketa Azadî Metîn Pîranî jî ji bo îfadeyê bi xwe ra birin Emnîyeta Dîyarbekirê. Piştî ku îfadeya wî li Emnîyetê hate girtin, Nûrûllah Tîmûr di eynî şevê da hate berdan, Metin Pirani hîna jî nehatîye berdan .

Helbete ku êrîş û qedexeyên li ser Alaya Kurdistanê ne cara yekeme ku pêk tên. Li Bakurê Kurdistanê û li Tirkîyeyê gelek caran Alaya Kurdistanê rû bi rûyî êrîş û qedexeyan bûne.Roja 17ê Çileya Pêşîn ji berk u Alaya Kurdistanê hildane, berpirsên CNKyê Jîyan Tîmûrtaş û Şerzan Kiliçaslan jî li Amedê hatine desteser kirin û hîna jî nehatine berdan. Em vê biryara Serdozgerê Cimhûrîyetê yê Amedê û helwesta polîsên Emnîyeta Amedê ya li ser Hereketa Azadî, PAK û PSKyê jî, êrîşên berê jî, wek êrîşên li himberî nirxa neteweyî, niştimanî ya gelê Kurdistanê , êrîşeke li himber azadîya xwe îfade kirinê û azadîya xebata rêxistinî dibînin. Em van êrîşan, van biryaran şermezar dikin.

Alaya Kurdistanê nirxeke herî mezin a neteweyî, niştimanî ya hemû Kurd û Kurdistanîyên cîhanê ye. Tu kes nikare vê nirxê neteweyî qedexe bike. Em tu qedexeyên li ser Alaya Kurdistanê qebûl nakin, emê li himberî tu êrîşan serê xwe netewînin.

Em, qedexe, bêrêzî û êrîşên Dewleta Tirkîyeyê û yên nîjadperestan yên li ser Alaya Kurdistanê, şermezar dikin.

Alaya Kurdistanê herweha alaya fermî ya Herêma Federe ya Başûrê Kurdistanê ye jî. Alaya Kurdistanê li gorî Qanûna Bingehîn a Federe ya Iraqê jî , alayeke fermî ye ku hemû dewletên cîhanê jî qebûl kirine.

Gelek caran Serokkomar û wezîrên Dewleta Tirkîyeyê, li gel Alaya Tirkîyeyê, bi Alaya Kurdistanê jî hevdîtinên fermî li gel Rayadarên Herêma Kurdistanê kirine.

Polîsên Amedê gotin em ji bo Alaya Kurdistanê hatine li nava avahîyên teşkîlatên hersê partî û hereketan bigerin ; lê di encamê da, li gel alayên Kurdistanê dest danîne ser hemû kompîtur, dokumentên fermî, kovar û afîşên û eşyayên din yên li hersê avahîyan. Ev jî binpêkirina mafê azadîya ramanî û azadîya xebata rêxistinî ye.

Belê, Alaya Kurdistanê nirxa me ya neetweyî ye û emê her û her hildin.

Emê serê xwe li himberî tu êrîşan netewînin.

19.12.2022

Hereketa Azadî

Partîya Azadîya Kurdistanê(PAK)

Partîya Sosyalîst a Kurdistanê(PSK)