Hereketa Azadî, PAK, PSK semedo ke hêrîşê ser Alaya Kurdistanî û ser teşkîlatanê xo yê Amedî şermezar bikê, roja 20.12.2022yî Cemîyetê Rojnamegeran yê Dîyarbekirî de bi Alaya Kurdistanî kombîyayîşê çapemenîye viraşt.

Nameyê Hereketa Azadî, PAK, PSKyî ser beyanato hempar bi kurmancî Vervayoxê PAKî Hanîfî Tûran, bi tirkî zî endama Komîteya Rayberîye ya Merkezî ya PSKyî Selva Baksî wend. Kurmancî, kirmanckî/zazakî û tirkîya beyanatî çapemenîye ra ame vilakerdiş.

Pa rayber û endamê Hereketa Azadî, PAK, PSKyî, temsîlkarê TDK-TEVGER, HAK-PAR, DDKD, PDK-Bakur, KKP, Partîya Azadî, PIA, PDKT, DBP, HDPyî û xeylê sîyasetmedar û roşinvîrê Kurd zî semedê hetkarîye beşdarê kombîyayîşê çapemenîye bîyê.

Wendişê beyanatê hemparî ra dima, sîyasetmedar û roşinvîro Kurd Îbrahîm Guçluyî zî derheqê hêrîşanê ser Alaya Kurdistanî û sereştişê her hîrê partî û hereketan de agahî da.

Temsîlkarê xeylê partî, hereket û rêxistinan zî kombîyayîşê çapemenîye qisey kerdê, hêrîşê vera Alaya Kurdistanî û hêrîşê ser partî û rêxistinanê kurdistanî şermezar kerd.

Xeylê telewîzyon û dezgehê çapemenîye zî ameyî kombîyayîşê çapemenîye, weşanê zindî kerdê.

No zî beyanatê hempar yê Hereketa Azadî, PAK, PSKyî yo:

…………………………………………………

Ma do sereyê xo vera tu hêrîşan xo ver nêcane; Alaya Kurdistanî ercê ma ya neteweyî ya

Waştişê Serdozgerê Cimhûrîyetî yê Amedî ser o û bi îznê Dadgeha Sulh û Cezaye ya Yewine ya Amedî, polîsê Emnîyeta Amedî, roja 19.12.2022yî eştê Teşkîlatanê Amedî yê Hereketa Azadî, PAK û PSKyî ser.

Seke yeno zanayîş bi minasebetê Roja Alaya Kurdistanî, Hereketa Azadî, PAK û PSK Teşkîlatanê xo yê Amedî de Alaya Kurdistanî aliqnabî. Û sey xebere tay keyepelan de fotografê Alaya Kurdistanê yê Hereketa Azadî, PAK û PSK ameybî vilakerdiş.

Tay kesê nîjadperestî, sosyal medya ser o ê fotofrafî kerdbî sebebê herîşê vera Alaya Kurdistanî û Hereketa Azadî, PAK û PSK zî sey hedef nîşan dabî.

Serdozgerê Cimhûrîyetî yê Amedî nuşteyê ê nîjadperestan sey şîkayet qebûl kerdo û bi îznê Dadgeha Sulh û Cezaye ya Yewine ya Amedî îznê cipersayîşî dayo.

Polîsê ke eştê serê awanîyanê Hereketa Azadî, PAK û PSKyî ê belgeyê îznî mojnayê rayberanê her hîrê partî û hereketan û dest bi cigêrayîşê mîyanê awanîyanê her hîrê partî û hereketan kerdê.

Vatê ‘’Semedo ke şima Alaya Kurdistanî serê tabelaya teşkîlatê xo de aliqnaya, Serdozgerê Cimhûrîyetî yê Amedî îznê gêrayîşê mîyanê awanîye dayo ma. Ma no sebeb ra ameyê’’.

Herçiqas, sebebê înan gêrayîşê sey Alaya Kurdistanî ameyo nîşandayîş zî, polîsan, pêro eşya û kitabê ke mîyanê awanîyan de bî kerdê têzerê, xeylê afîş û dokumanê ke awanîyan de bî arÊdayê, dest ronayê heme kompîtur, dokumanê resmî, kitab, kovar, afîş û alayê Kurdistanî ser û berdê Emnîyeta Dîyarbekirî.

Polîsê Emnîyeta Amedî Hetkarê Serekê Pêroyî yê PAKê Nûrûllah Tîmûr, Sekreterê Hereketa Azadî Metîn Pîranî zî semedê îfadeyî xo reyde berdê Emnîyeta Dîyarbekirî. Serdozgerê Cimhûrîyetî yê Amedî de karê dayîşê îfadeyî ra dima Nurullah Tîmur eynî şewe de serbest veradayî û Metin Pirani jî heta nuha nehatîye veradayîş.

Key ke Roja Alaya Kurdistanî de PAK, PSK û Hereketa Azadî, awanîyanê xo de Alaya Kurdistanê aliqnay, tay nuştoxê nîjadperestî her hîrê partî û hereketan rê hêriş kerdbî û ê sey hedef nîşan dabî. Asîyeno ke nê qerarê serdozgerî de tesîrê ê nîjadperestan zî esto.

Alaya Kurdistanî ercêka neteweyî, niştimanî ya şarê Kurdistanî ya. Tu kes nêeşkeno na erce qedexe biko û ma qedexeyêka wînayêne nas nêkenê.

Helbet ke hêrîş û qedexeyê ser Alaya Kurdistanî reya verêne nêbenê. Roja 17ê Kanûne semedo ke Alaya Kurdistanê aliqanayê, mesulê CNKyî Jîyan Tîmûrtaş û Şerzan Kiliçaslan zî Amed de ameyê tepiştiş û hîna zî nêameyê veredayîş. Ma nê qerarê Serdozgerê Cimhûrîyetî yê Amedî û helwestê polîsanê Emnîyeta Amedî yê ser Hereketa Azadî, PAK û PSKyî zî, hêrîşanê verê cû zî, sey hêrîşên vera ercê neteweyî, niştimanî yê şarê Kurdistanî, hêrîşêkê vera azadîya xo îfade kerdişî û azadîya xebata rêxistinî vînenê. Ma nê hêrîşan, nê qeraran şermezar kenê.

Alaya Kurdistanî ercêka tewr pîle ya neteweyî, nişitimanî ya heme Kurd û Kurdistanîyanê dinya ya. Ma tu qedexeyanê ser Alaya Kurdistanî qebûl nêkenê. Ma qedexe, bêrêzî û hêrîşanê nîjadperetan yê ser Alaya Kurdistanî, şermezar kenê.

Alaya Kurdistanî hetêk ra zî alaya resmî ya Herêma Federe ya Başûrî Kurdistanî ya zî. Alaya Kurdistanî gorê Qanûnê Bingehînî ya Federe ya Iraqî zî, alayêka resmî ya ke heme dewletanê dînya zî qebûl kerda ya.

Zaf rey Serokkomar û wezîrê Dewleta Tirkîya, verê Alaya Tirkîya, bi Alaya Kurdistanî pêvînayîşê bi resmî Rayberê Herêma Kurdistan dir kerdê.

Polîsê Amedî vatê, ma semedê Alaya Kurdistanî ameyê teşkîlatanê her hîrê partî û hereketan; la peyê cû dest ronayê heme kompîtur, dokumentê fermî, kovar û afîş û eşyayê bînan ser. No zî binpaykerdişê heqê azadîya fikrî û azadîya xebata rêxistinî yo.

Belê, Alaya Kurdistanî rûmetê ma ya û ma do tin pê wayîr vejîyê. Ma do sereyê xo vera tu hêrîşan xo ver nêcane.

19.12.2022

Hereketa Azadî

Partîya Azadîya Kurdistanî(PAK)

Partîya Sosyalîst a Kurdistanî(PSK)