Navenda Nûçeyan- Emîndarê Giştî yê Wezareta Pêşmerge, Cebar Yawer ragihand, ew bi tu awayekê nikarin hûrgilyên wê alîkarîyê eşkere bikin, ka hejmar û amar û qasa wê çende, ji ber ku ev yek mijareke serbazî ye.

Li ser çaksazîyên di Wezareta Pêşmerge de, Cebar Yawer got, hevpeyamnîya navdewletî bi taybet Amerîka, Brîtanîya, Almanya û Holenda di vê proseyê de beşdar in û ji bo reformên di wezaretê de alîkar in.

Berdevkê Hevpeyamnîya Navdewletî, Maylz Kagînz jî di daxuyanîyekê de li Navenda Rojhilata Navîn a bo Raport û Şîroveyan ragihandibû, ew dê zêdetir ji 100 hummerên serbazî û hejmareke parçeyên çek, hawen û fîşek û amûrên bêtel bidin hêzên pêşmerge.

Berdevkê Hevpeymanîya Navdewletî dîyar kiribû, ji bilî wan alîkarîyên serbazî, Hevpeymanîya Navdewletî û hêzên wan berdewam dibin li ser rahênena Pêşmerge û tekez jî kiribû, ku alîkarîyên wan bo Hêzên Pêşmerge demdirêj in.

General Kagînz amaje bi proseya reformê ya di Wezareta Pêşmerge de jî kir û destnîşan kir, ew reform 38 xalên sereke li xwe digire û armanc ji wê pêngavê jî ew e ku hêzeke Pêşmerge ya yekgirtî û bihêz hebe. Kagînz herwiha got, ji sala 2017 ve dest bi proseya reformê hatîye kirin û hin karên baş jî hatine kirin.

Berdevkê Hevpeymanîya Navdewletî amaje bi wê yekê jî kir, ku ji bo wan giring e ku hevahengîya navbera Wezareta Berevanîyê ya Iraqê û Wezareta Pêşmerge bê zêdekirin, ji bo ku fişarên li ser rêxistina DAIŞê zêdetir bin.

Hêzên Pêşmerge yê Herêma Kurdistanê di şerê li dijî DAIŞê û têkşikandina wê rêxistina terorîstî de roleke berçav û bi bandor hebû, lewma jî niha Hevpeymanîya Navdewletî berdewam alîkarîya Pêşmerge dike û çek û kelûpelên serbazî jê re dişîne.

Çavkanî: Rûdaw