Heyetêka PAKî (Partîya Azadîya Kurdistanî) roja 02.03.2022î Anqara de Merkezê Pêroyî yê CHPyî de pêvînayîşêk kerd. Pêvînayîş waştişê PAKî ser o virazîya.

PAKî semedo ke waştişanê acîl ê miletê Kurd bi AK Partî, CHP, Deva Partîsî, Gelecek Partîsî, Saadet Partîsî reyde pare biko, bi hawayêko resmî serra 2021î de nê partîyan ra randewû waştbi. Heta nika tu partîyan nê waştişê pêvînayîşî red nêkerd. Tay partîyan va, demêko maqûl de do no pêvînayîş bibo. La reya yewine CHP pêvînayîş qebûl kerdo. PAKî qerar girewto ke, badê zî semedo ke HDP û tay partîyanê bînan reyde zî Programê Waştişanê Acîl pare biko, do înan ra waştişê pêvînayîşî biko.

Pêvînayîşê bi CHP reyde, heyeta PAKî de Hetkarê Serekê Pêroyî yê PAKî Birêzî Nûrûllah Tîmûr û Kasim Ergun estbî.

Nameyê Serekê Pêroyî yê CHPyî Birêz Kemal Kiliçdaroglu ser o, Hetkarê Serekê Pêroyî yê CHPyî Birêz Ogûz Kaan Salci ame heyeta PAK ver.

Heyeta PAKî semedê nê pêvînayîşî CHP rê sipas kerd.

Heyeta PAKî pêvînayîş de, derheqê dewaya qefilnayîşî ya ke derheqê PAKî de ameya akerdiş de agahdarîyê hîrayî day û derheqê azadîya fikrî û rêxistinî de CHP ra waşt ver ana dewaya qefilnayîşî de reaksîyon nîşan bidê.

Dewamê pêvînayîşî de, heyeta PAKî bi hawayêko zelal razînêbîyayîşê xo derheqê operasyonê eskerî yê Dewleta Tirkîye de îfade kerd û va, lazim o şer vindero, PKK zî çalakîyanê xo yê çekdarî peynî biko û lazim o rayîrê dîyalogî û çareserîya sîyasî semedê heme hetanê kurdan bêto akerdene.

Heyeta PAKî, bi nuştekî Programê Waştişê Acîl yo ke 18 made yo pêşkêşê CHP kerd û bi kilmî derheqê nê waştişanê acîlan ê miletê kurd û ewnîyayîşê PAKî de wîna va:

’’ Ma roja 18.10.2020î de  Anqara de Kongreya 2yîne ya Îstîsnayî ya PAKî viraşt û a kongre de ma Programê Waştişê Acîl o ke 18 xalan ra yeno pê zî tesbît kerd. Tecrubeyê 99 serrî yê Dewleta Tirkîya zî îspat kerdo ke heta ke meseleya Kurd û Kurdistanî çareser nêbo, Tirkîya rê zî demokrasî nêna. Seba na rastîye zî, ma vanê semedo ke rayîrê vernîya çareserîya meseleya Kurd û Kurdistanî abibo,  semedo ke rayîrê demokrasî abibo, ganî ca de nê waştişê acîlî bêrê ca. Nê 18 xalanê waştişê acîlan ma eşkenê bi kilmî wîna terîf bike:

Ganî nasnameyê miletê kurd Qanûnê Bingehînî û heme Qanûnanê Dewleta Tirkîya de bêrê qebûl kerdene.

Ganî Qanûnê Bingehînî yê Tirkîye de û heme qanûnanê bînan de astengî û qedexeyê ser nameyê Kurdistanî  bêrê wedaritiş.

Ganî ziwanê kurdî (Kurmancî, Zazakî/Kirmanckî) bibo ziwanê resmî û bibo ziwanê perwerdeyî û ganî her di  heqî zî Qanûnê Bingehînî û heme qanûnnê bînan de bêrê bica kerdene.

Ganî heme astengî û qedexeyê  verê azadîya fikrî, dînî û rêkxistinî bêrê  wedaritiş. Ganî yasa û qanûnî rayîr bidê ke dezgeh û partîyê bi nameyê Kurdistanî bêrê  awan kerdene.

Ganî heme heq û azadî Qanûnê Bingehînî û qanûnanê bînan de bêrê garantî kerdene.

Ganî Dewleta Tirkîya heme dewa û daweyê yasayî yê ser kesê ke semedê xebatanê xo yê siyasî, semedê nuşte û qiseykerdişanê xo wedaro, êyê ke semedê parekerdişanê xo yê medyaya sosyale înan rê dewa ameya akerdene û ganî heme hepsîyê sîyasî derxal bêrê veradayene.  

Ganî Dewleta Tirkîya, heme peymananê mîyannetewî bîyaro ca û ganî heme şerhanê xo yê naya ro ‘Krîterê Rayberîya Otonom ya Ewropa0’, ‘Peymanê Heqanê Domanan’ û heme peymananê bînan yê mîyannetewî wedaro û nê peymanan bêkêmanî  bîyaro ca.

Ganî Dewleta Tirkîya Madeyê 90nî yê Qanûnê Bingehînî yê Tirkîya bîyaro ca’’.

Hetkarê Serekê Pêroyî yê CHPyî Birêz Ogûz Kaan Salci zî seba nê zîyaretî heyeta PAKî rê sipas kerd û  derheqê rewşa Tirkîya, herême û bîyayîşanê dinya de fikrê CHPyî îfade kerd.

Pêvînayîşê PAK û CHPyî de pê îfadekerdişê fikrê her di hetan bi hawayêko berhemdar vîyart. Her di hetan zî muhîmîya dewamîya dîyalogê mabênê her di partîyan îzah kerd.

02.03.2022

Buroya Çapemenî û Têkilîye ya PAKî